Ацы бонты Цæгат Ирыстон æвдисæн уыд егъау культурон цауæн – Евгений Вахтанговы бонтæ нæ республикæйы. Дзæуджыхъæуы кадджын уавæры байгом зындгонд режиссеры хæдзар-музей. Уæдæ Евгений Вахтанговы театры актертæ сæ курдиат æвдыстой республикæйы театрты сценæтыл, стæй ног арт-кафейы. «Пиковая дама», «Евгений Онегин», «Царь Эдип», æмæ ма æндæр цымыдисаг æмæ зындгонд спектакльтæ федтой ирыстойнаг театрдзаутæ.
Ам алы дзаума, алы къуым дæр æвдисæн у Евгений Вахтанговы рæстæгæн. Ацы хæдзары цард 100 азы размæ. Ардæм æрбацæугæйæ рæстæг раст цыма лæугæ æркæны. Адæймагмæ афтæ фæкæсы, цыма ныртæккæ иннæ уаты къæсæрæй бахизгæйæ фембæлæн ис зындгонд режиссерæн йæхиуыл. Уæвгæ, ивгъуыдыл афæлгæсын бирæты фæндыд. Историон цаутæ бæлвырд чи зоны, ахæм профессионалон гидтæ. Уæдæ нырыккон техникон фæрæзтæ дæр.
19-æм æнусы хæдзары дзауматæ, фыстæджытæ, иуæй-иутæ та ма Евгений Вахтанговы къухфыстимæ. Рацæуæны та, бахъахъхъæнын кæй бантыст, ахæм дуæрттæ ноггондæй. Адæймаг цыма Вахтанговы бинонтæм уазæгуаты ис, афтæ кӕсы ӕрбацӕуӕгмӕ.
Ай та, Евгений Вахтанговы фыд Багратионы кусæн агъуыст. Сног æй кодтой историон бæлвырддзинæдтæ хынцгæйæ. Уыцы рæстæджы хæдзары дзауматæ агуырдтой æгас Уæрæсейы. Хицæн уаты – рояль, кæддæр ыл ахуыр кодта цæгъдын чысыл Евгений Вахтангов. Ам ис проектор æмæ аудиогид, дзуры, хæдзар сног кæныныл куыд архайдтой, уыцы истори.
Музейы фыццаг уæладзыджы ис арт-кафе. Пушкины «Пиковая дама»-йæ йын йæ архайд райдыдта адæмон артист Евгений Князев. Иунæгæй сценӕйы сарæзта 3 сурæты. Спектакль Евгений Князев хъазы ныр 17 азы дæргъы.
«Пиковая дама» спектаклы ис аншлаг. Кнзевы курдиатæн аргъ скъæнын уыд бирæты бæллиц. Уæвгæ дзы бынæттæ 80 йедтæмæ нæй. Фæлæ уымæ гæсгæ у цымыдиссагдæр.
Евгений Вахтанговы театры актерты гастрольтæ та Ирон театры сценæйы райдыдтой зындгонд постановкæ – «Евгений Онегин»-æй.
Уырыссаг литературæйы историйы сæйрагдæр хъайтартæй иу – сценæйы. Евгений Онегины миддуне æнцон раргом кæнæн нæу. Фæлæ Вахтанговы театры актертæ уыцы хæс сæ курдиаты руаджы æнцонæй æххæст кæнынц. Æмæ кæд спектакль рагæй хъазынц, уæддæр сын сценæмæ сæ алы рацыд дæр у фæлварæнау. Уæлдай æхсджиаг та ма сын уымæн у, æмæ йæ сæ театры бындурæвæрæджы райгуырæн горæты кæй æвдисынц.
Спекталы арф хъуыдытæ театрдзауты дисы ӕфтауынц. Евгений Онегин æмæ Татьяна Ларина, Ольга æмæ Ленскийы æнкъарæнтæ ирдæй æвдисынц курдиатджын актертæ.
Ацы культурон цау республикæйы цæрджытæн цы æнкъарæнтæ балæвар кодта, уыдон ныууагътой арф фæд. Вахтанговы театры актертæн бантыст алы театрдзауы зæрдæ дӕр бацагайын. Абон уыд егъау гастрольты кæронбæттæн бон. Дзæуджыхъæу та фидæны ногæй æнхъæлмæ кæсдзæн сæ уарзон актертæм.
Гугкаты Иринæ
