Дзæуджыхъæуы нымæцон ахуырады центр сывæллæттæн «IT-куб» фæзынд афæдз размæ. Инновацион фæзы арæзтадæн фадат фæци федералон проекты фæрцы. Стыр æргом дзы здахынц нымæцон программæтæ аразыны къабазмæ. Ахуырадон программæтæ дзы кусынц 6 хуызмæ гæсгæ.
Нымæцон ахуырады центрмæ скъоладзаутæ зæрдиагæй цæуынц. Ам сæм æрвылбон æнхъæлмæ кæсынц ног, цымыдисаг зонындзинæдтæ. Битеты Евæ цæуы виртуалон царды ахуыртæм. Куыд зæгъы, афтæмæй йын фыццаг зын уыди, фæлæ ахуыргæнджыты руаджы ног технологитыл тагъд фæцалх.
Эдуард Дводненко та IT-клубмæ фыццаг хатт æрбацыд. Программировани йæ рагæй цымыдис кæны. Цæмæй сарæхса, уый тыххæй йын ныр хорз фадат фæзынд.
Æрвылаз августы сывæллæттæн бирæ мадзæлттæ бацæттæ кæнынц. Ныр дæр сын сарæзтой экскурси Нымæцон ахуырады центры æппæт секцитыл. Афтæмæй сæхицæн сæ фидæны дæсныйад сбæлвырд кæнынц.
Ахуырты райдианы уал скъоладзауты базонгæ кæнынц дæсныйады ахсджиагдæр хæйттимæ. Уый фæстæ райдайынц лæмбынæг ахуыртæ. Ныртæккæ къорды ис 12 адæймаджы. Уый фæрцы ахуыргæнджытæн ис ахуырдзаутæй алкæмæн дæр хицæн рæстæг рауæлдай кæныны фадат.
Нымæцон ахуырады центр «IT-куб» Дзæуджыхъæуы байгом афæдз размæ. «Ахуырад»-ы нацпроекты фæлгæты арæзт центры сывæллæттæ ахуыр кæнынц лæвар. Исынц нымæцон къабазы зонындзинæдтæ, уыимæ фæархайынц алыхуызон конкурстæ æмæ проектты.
