Дзæуджыхъæуы ныр 7-æм хатт райдыдта национ фестиваль “Фыдæлты фарн”. Цæгат Кавказы базарадон-экономикон колледжы студенттæ йæм сæхи цæттæ кодтой мæйы дæргъы. Архайджытæм æнхъæлмæ кæсынц алыхуызон тематикæимæ æмæ программæтимæ фæзтæ. Алы адæмты хæринæгтимæ бæркадджын фынгтæ. Адджын пылæуæй райдай æмæ нæхи традицион чъиритæ æмæ ирон бæгæныйы онг. Сцæттæ сæ кодтой колледжы студенттæ. Тематикон фæзтæ æвдисæн сты алыхуызон культурæтæн. Мæнæ ацы бынаты сæрмагонд уæлæдарæсы сабитæ хуыйынц кæлмæрзæнтæ æмæ архайынц алыхуызон хъæзтыты. Мадзал бабæрæг кодта Тускъаты Таймураз. Республикæйы Парламенты сæрдар федта фæзтæ, мадзалы архайджытæ йæ сбуц кодтой хъазахъхъаг адæмон зарæгæй.
Уый фæстæ та кадджын хай. Базарадон-экономикон колледжы актон залы сæмбырд сты уазджытæ. Се ‘хсæн алы адæмты минæвæрттæ. Æмткæй 100-йæ фылдæр. Ахуыргæнджытæ, студенттæ, Парламенты депутаттæ. Сценæйыл сфæлдыстадон къордтæ, суанг ма адæмон артисттæ дæр.
Мадзал, æцæгдæр егъау рауад. Къуыримæ йæ бабæрæг кæндзысты республикæйы 72 скъолайы. Фæсивæд архайдзысты алыхуызон конкурсты æмæ зонадон ерысты. Хуыздæртæ сбæрæг уыдзысты чъиритæ кæнынæй æмæ ирон бæгæны фыцынæй. Уæлахиздзаутæ райсдзысты зынаргъ лæвæрттæ æмæ дипломтæ.
Æгъдау æмæ фарны бындурыл фæсивæды хъомыл кæнын, хистæртæн кад кæнын, адæмты традицитæ нымайын – ацы хъуыддæгтæ сты национ фестивалы сæйраг нысантæ. Афæдзæй-афæдзмæ программæ хъæздыгдæр кæны, сразæнгард æм кæны фылдæр адæмы. Ахæм ахсджиаг цауты фæрцы та кæстæртæ фæлтæрæй-фæлтæрмæ аргъ кæндзысты фыдæлты фарнæн.
