Ацы цаумæ студенттæ æмæ ахуыргæнджытæ æнхъæлмæ кастысты æнусы æрдæгæй фылдæр. Дзæуджыхъæуы педагогон колледжы райдыдта бындурон цалцæг. Бæстыхай ноггонд нæ уыд Советон Цæдисы рæстæгæй. Аразджытæ ивынц алцыдæр – мидæггаг куыстытæй æддаг бакасты онг. Уæрæхдæр кæнынц аудиторитæ, ауайæнтæ райдзастдæр, æппынфæстаг дзы фæзындзæн хæрæндон дæр. Уымæ бирæ азты бæллыдысты. Студенттæ дæр фæсте нæ фæлæууыдысты. Уыдон æхсызгонæй æххуыс кæнынц, сæ колледжы ног къултæ амайынц.
Кæддæр иу ацы агъуыстытæ байдзаг сты фортепианойы аив зæлтæй. Ныртæккæ та дзы хъуысы бынтон æндæр инструментты мелоди.
Педагогон колледжы куыстытæ сæ тæмæны бацыдысты. Аразджытæ ныридæгæн райхæлдтой бæстыхайы дыууæ уæладзыджы, æртыккаджы та цæуынц мидæггаг куыстытæ. Ам бындурон цалцæгмæ æнхъæлмæ кастысты 55 азы. Уыцы рæстæгмæ ма корпусы хицау дæр фæивта: раздæр ацы бынаты уыд музыкалон – педагогон училищæ. Æнусы æрдæгæй фылдæр студенттæ æмæ педагоготæ сæхи тыхтæй хуыздæр кодтой кусæндоны уавæртæ, фæлæ рæстæгимæ уый дæр нал фаг кодта. Нацпроект “Фæсивæд æмæ сывæллæтæ”- йы фæлгæты хъуыддаг фæивта.
Чысыл бæстыхайы 30 адæймагæй къорд æрбынат кæнын – æнцон нæу. Ахсджиаг фарстатæй иу у бынат кæй нæ фаг кæны, уый. Фарон колледжмæ æрбацыд 300 адæймаджы, уадзгæ та ракодтой æрмæст 120. Ныр кабинеттæ фæуæрæхдæр кæндзысты баивдзысты дзы æппæт дзауматæ. Фæаивдæр уыдзысты ауайæнтæ. Хæрзарæзт æрцæудзæн йæ æддаг бакаст дæр. Фæнд кæнынц разуынд банывыл кæнын, зæронд къæйдуртæ та баивдзысты нырыккон плиткæйæ.
Колледжы фæзындзæн хæрæндон дæр. Раздæры кабинеты бынаты сæвæрдзысты стъæлттæ æмæ бандæттæ, сфæлдыстадон æрмадзы та сифтонг кæндзысты къæбиц. Куыстытæ цæуынц иу мæй, мартъийы райдианæй аразджытæ рахызтысты рацарæзтæй электрикæмæ. Архайд цæуы тагъд. Æппæт куыстытæ фæнд кæнынц сентябры фæуын, уый та нысангонд рæстæгæй æртæ мæйы раздæр у.Ныр бавналдзысты хъармгæнæн системæмæ.
Фæлæ объекты абон æрмæст кусджытæ нæ архайынц. Колледж рацаразынæн æххуыс кæнынц студенттæ дæр. Хъесаты Сабинæйæн цалцæг тынг æхсызгон у, ныр йе ‘мкурсонтимæ иу ранæй иннæмæ хæссынц дзауматæ.
Куыстыты рæстæг студенттæ ахуыр кæнынц Карл Марксы уынджы корпусы. Ныхасæн, ам бындурон цалцæг кæронмæ æрхæццæ фарон. Адæм бирæ кæй сты, уый тыххæй ахуыртæ цæуынц дыууæ фæлтæрмæ гæсгæ. Фæлæ фæсивæды ныхасмæ гæсгæ, уый æрмæст рæстæгмæ у. Тагъд аивадимæ зонгæ кæндзысты удæнцой уавæрты.
