Сæ спортивон цæттæдзинад равдыстой Дзæуджыхъæуы сæрдыгон лагерьты скъоладзаутæ. Ерыс кæнгæйæ ахсджиаг у цырд, æрхъуыдыджын æмæ арæхстджын уæвын. Уæлахиздзаутæ се ‘нæниздзинад фæхъæддыхдæр кодтой. Уæдæ сæм цы æнкъарæнтæ сæвзæрд, уый дæр къаддæр ахсджиаг нæу.
Кубик ракеткæйы афтæ ахæссынмӕ сарæхсын, цæмæй ма `рхауа, уыимæ ныхмæлæууæгæй тагъддæр. Сывæллæттæй алчидæр архайы йæ командæйæн уæлахиз æрхæссыныл. Фæлтæрæнтæ обручимæ, бæндæн асинимæ æмæ пуртиимæ. Сабитæ ерыс кæнынц сфæлдыстадон конкурсты дæр.
Ерыстæ сбастой наркотиктимæ тох æмæ сæ зилдухы ныхмæ мадзæлтты æппæтдунеон бонимæ. Сæйраг нысан фæсивæды `хсæн æнæниз цардыуаг парахат кæнын. Уый хыгъд æрыгон фæлтæрæн хорз фадат сæхи аирхæфсынæн æмæ ног æмбæлтты ссарынæн. Сывæллæтты тренертæ цымыдисæй кæсынц, сæ хъомылгæнинæгтæ хæслæвæрдтæ куыд æххæст кæнынц, уымӕ. Ахсджиаг у, рæстæг канд хъæлдзæгæй арвитын нæ, фæлæ ма командæйы æмархайгæйæ цæлхдурты сæрты сæрæндæрæй ахизын. Тренырты хæс æвзонг удты ныфс бауадзын æмæ сæ уæлахизмæ сразæнгард кæнын.
Мадзал бацæттæ кодта ахуырад æмæ наукæйы министрад «Республикӕйы сывӕллӕтты скъолаимӕ» иумæ. Уæлахиздзауты сбæрæг кæндзысты командæтæм гæсгæ. Уæлдæр бæрæггæнæнтæ чи райса, уыдонмæ æнхъæлмæ кæсынц кубоктæ, майдантæ æмæ зæрдылдарæн лæвæрттæ.
