Немыцы базæ ссарын, уацайрæгты суæгъд кæнын æмæ сусæггаг хъусынгæжнинæгтæ æрвитæн машинæ «Энигма» рахæссын. Архайджытæ, цыма Кавказы сæраппонд тохы фестадысты, афтæ цалдæр къордыл адих сты. Уæлахизы истори сæ хъæуы сæмбырд кæнын скъуыддзаггай. Æфсæддон балцвæд арæзт у 4 станцæйæ, алкæцыйы фæстæ дæр фæсивæд, сæ картæйы цы хæйттæ нæ фаг кæны, уыдон райсынц. Квестмæ бæрнон цæстæй ракастысты, сæхи æнувыдæй цæттæ кодтой.
Салдат хъуамæ автоматимæ архайын зона — йæ хæйттæ йын райхалын æмæ сæ фæстæмæ æрæмбырд кæнын. 10 секунды — уыйбæрц рæстæг бахъæудзæн профессионалы. Æвæлтæрд чи у, уый та хъуыддагмæ фылдæр тыхтæ саразын хъæуы. Уымæн æмæ командæйы уæлахиз йæ алы архайæгæй дæр у аразгæ. Квесты ацы къæпхæн æппæты цымыдисагдæр у, фæлæ уыимæ æппæты зындæр.
Фæуæлахиз уыдзæн, æппæт къæпхæнтæ тагъддæр чи ацæуа, уыцы командæ. Цæмæй немыц кæм сты, уырдæм бахæццæ уай, уый тыххæй хъæуы дыууæ цæугæдоны сæрты ахизын æмæ фыццаг медицинон æххуыс бакæнын зонын. Дарддæр — интеллектуалон хъазт. Фæрстытæн раст дзуæппытæ чи ратта, уый знаджы танчытæ ныддæрæн кæндзæн. Ам фæсивæд райсынц царды хъæугæ фæлтæрддзинад.
Æмæ мæнæ финишмæ æрбахæццæ сты. Æфсæддонтæ иууылдæр сæрæгас сты, чысыл цæфтæй аирвæзтысты. Ныр ма сæм финалы иу ныхмæлæуд æнхъæлмæ кæсы. Сæйраг призыл тох кæндзысты 8 командæйы. Архайджыты мидбылхудт æмæ сæ æнувыд фарсонты къухæмдзæгъдæй зæрдæ райы. Ахæм мадзал Дзæуджыхъæуы сарæзтой фыццаг хатт.
Хъазты фæрцы фæсивæд æрхъуыды кодтой советон салдæтты хъæбатырдзинад. Стæй, цалынмæ уыдон тохы быдыры уыдысты, уæдмæ сын фæсфронтæй куыд æххуыс кодтой. Уæлахиз къухы куыд бафтыд, уый рохгæнæн нæй!
