Алайнаг гимназы кадджын уавæры схорзæхджын кодтой ирон æвзаг æмæ литературæйы олимпиадæйы уæлахиздзауты. Ацы аз дзы сæ зонындзинæдтæ равдыстой 12 мин скъоладзауæй фылдæр. Уыдонæй раззагдæртæ систы 9-æй. Ахæм хатдзæгтæ сæ къухы бафтыдысты бæстон куысты фæрцы. Сæ ахуыргæнджытимæ иумæ сæхи къорд рæстæг цæттæ кодтой. Æвзæрстой нæ фыдæлты культурæимæ баст фæрстытæ. Олимпиадæ у æрвылазон æмæ арæзт у цалдæр къæпхæнæй.
Кады гæххæтытæй хорзæхгонд æрцыдысты уæлахиздзаутæ æмæ сæ ахуыргæнджытæ. Мадзал сбастой Ирон æвзаг æмæ литературæйы бонимæ. Скъоладзаутæ уазджытæн бацæттæ кодтой аив равдыст – кæфтытæ, зарджытæ æмæ æмдзæвгæтæ. Бæрæгбоны уазджытæ — “Аланты Ныхасы” минæвæрттæ, “Иудзинады” уæнгтæ, ирон æвзаджы райрæзты центры сæргълæууæг Куыдзойты Анджелæ. Æмбырды архайджытæн арфæ ракодта министры хæдивæг Дзанайты Марк.
