Историон Райгуырӕн бӕстӕмӕ Туркӕй делегаци знон ссыд. Тхостаты, Хъуысаты, Батиаты, Ӕлбегаты, Цъӕхилты мыггӕгты минӕвӕрттӕ фыццаг хатт сты Ирыстоны. Раздæр уал бабæрæг кодтой Беслӕны фыццæгæм скъола. Къухты дидинджытæ, зӕрдӕйы — 22 азы размæ уæззаудæр фæлварæн чи бавзæрста, уыцы адæмыл мæт.
Ацы скъолайы спортивон залы æнуды амынæты райстой минæй фылдæр адæймаджы. Ӕнӕ хӕринаг ӕмӕ дон, сӕ сӕрмӕ та рæмудзæн æрмæджытæ ауыгъд, афтæмæй. Амæттæгты къамтӕм кӕсгӕйӕ, цæссыгтæ зын уромӕн у. Хъуысаты Омер ссардта йӕ хион Алана Доганы портрет. Йӕ кӕстӕр хо аирвӕзт, Аланӕ та ам баззад ӕнусмӕ. Омерӕн уый у, ферохгӕнӕн кӕмӕн нӕй, ахӕм рис.
Пырх скъолайы Турчы ирӕттӕ бирӕ рӕстӕг уыдысты. Мӕт кӕнгӕйӕ ӕмӕ хъуыдытӕ кӕнгӕйӕ, ахӕм хъуыддаг хъуамӕ макуыуал ӕрцӕуа, зæгъгæ. Ирыстонмæ делегаци ссыд проект “Возвращение на родину”-йы фæлгæты Таболты Дзерассӕйы разамындӕй.
Турчы делегаци Цӕгат Ирыстоны фӕуыдзӕн 7 боны. Уазджытæн бацӕттӕ кодтой экскурситӕ историон ӕмӕ ӕрдзон бынæттыл. Беслӕны скъола сси, сӕ зӕрдӕйы хай кӕм баззад, ахӕм бынат. Рохгӕнӕн цы трагедийæн нæй, уыцы ӕвирхъау цаутӕ ӕнусмӕ сӕ фӕд ныууагътой.
Лидия Цахилова, Алан Суанов
