Дзæуджыхъæуы цæуы дыккаг æппæтдунеон поэтикон фестиваль “Ирон Фæндыр”. Ахæсдзæн 13-17 октябрьмæ. Йæ сæйраг нысан ирон литературæ парахат кæнын. Сæмбырд кодта Цæгат Кавказы æмæ Уæрæсейы зындгондæр фысджыты, поэтты æмæ тæлм ацгæнджыты. Фестивалы фæлгæты арæзт цæуынц чингуыты презентацитæ. Республикæйы уазджытæ бабæрæг кæндзысты музейтæ.
Æмдзæвгæты фæрцы хæстæгдæр базонæн ис алы адæмты. Поэзи куыд айдæн, афтæ сын æвдисы сæ зондахаст, истори, сæ циндзинад æмæ маст. Уацмысты фæрцы ирон адæмы удыхъæд чи раргом кодта уыдонæй иу уыд Джыккайты Шамил. Йæ номимæ сбастой поэтикон фестиваль “Ирон фæндыр”.
Мадзал байгом кодтой ирон адæмон поэты цыртдзæвæныл дидинджитæ сæвæрынæй. Шамилы ном ссарынмæ сæмбырд сты Уæрæсейы æмæ Цæгат Ирыстоны фысджыты цæдисты уæнгтæ, бæстæйы раззагдæр тæлмацгæнджытæ, литературон архайджытæ. Уыдон, æнæмæнг Джыккайы-фырты сфæлдыстадæн стыр аргъ кæнынц.
ЦИПУ-йы ацыд Шамилы æмдзæвгæты æмбырдгонд ” И скорбь и радость и любовь”-ы презентаци уырыссаг æвзагыл. Афæдзы дæргъы йыл архайдтой бæстæйы хуыздæр тæлмацгæнджытæ – се ‘хсæн Валерий Латынин, Андрей Расторгуев.
Ныр поэты аив рæнхъытимæ базонгæ уыдзысты уырыссагау кæсджытæ. Æмбыргонды æмдзæвгæты сæйраг мидис – адæммæ уарзондзинад, сæ хъысмæтыл катай. Презентацийы уыдысты уазджытæ сыхаг республикæтæй, Хуссар Ирыстон, Абхази æмæ суанг Индийæ дæр.
Чиныгыл чи бакуыста, уыдоны фæнысан кодтой Кады гæххæттытæй, мадзаларазджыты та Василий Шукшины номыл майдантæй. Уыдоны ныхсамæ гæсгæ, дарддæр цæудзæн куыст ирон поэтты æмдзæвгæтæ тæлмац кæныныл, фидæны фестивальтæм бацæттæ кæндзысты ног чингуытæ. Ирон литературæимæ базонгæ уыдзысты æгас Уæрæсейы æмæ дунейы.
Ирон æвзагмæ тæлмацгонд хæстон зарджытæй байгом кодтой чиныг “В живом строю”-йы презентаци. Æмбырдгондмæ бахастой Фыдыбæстæйы Стыр хæсты архайæг ирон поэтты æмдзæвгæтæ. Уырыссаг æвзагмæ тæлмацгондæй. Чиныг рацыд фестивалы фæлгæты æмæ баст у Стыр Уæлахизы 80 азимæ.
Фестиваль “Ирон фæндырæн” ис стыр ахадындзинад. Дыккаг аз нæ республикæмæ ссæуынц Цæгат Кавказы æмæ Уæрæсейы кадджындæр поэтты, фысджытæ, тæлмацгæнджытæ. Мадзалы сæйраг нысан – ирон литературæ адæмты хсæн парахат кæнын. Расиды йæ культурæйы министрад, фысджыты цæдис, æхсæнадон змæлд “Иудзинад”. Ацы аз цæудзæн 13-17 октябрмæ.
Саулаты Аланæ
