Ацы сыфтæ хъахъхъæнынц горæты цæрджыты хъæбатырдзинады истори немыцы ныббырсты рæстæг. “Алагир, опаленный войной” – ацы чиныг, æвæццæгæн бакаст алы бынæттон цæрæг дæр. Кæй зæрдæ нæ сæнкъуысын кодта, ахæм нæ баззад. Йæ автор – Лаура Касимова. Рауагъдад узæлгæйæ дары тæрхæгыл. Æмæ æрмæст уый нæ – сылгоймаг ныр 15 азы кусы библиотекæйы, сывæллæттæм гуырын кæны литеартурæмæ уарзондзинад.
Чиныгдоны фæллой кæнынц фæлтæрдджын æмæ иузæрдион специалисттæ. Æрмæст хъæугæ чиныг нæ раттынц, фæлæ ма алы æрбацæуæгæн дæр баххуыс кæнынц зæрдæмæдзæугæ уацмыс ссарынмæ. Арæх скæнынц цымыдисаг мадзæлттæ. Уыдоны фæрцы горæты цæрджытæ бацархайынц литературон клубты, байхъусынц алыхуызон лекцитæм.
Æнæмæнг, сæйраг хæзна у чингуыты фонд. Йæ истори райдыдта суанг 1922-æм азы. Дыууæ ахуыргæнæджы, Матрена æмæ Мария Джапаридзе, сæмбырд кодтой мин æмæ æрдæг чиныгмæ æввахс æмæ байгом кодтой дзыллон кæсæндон. Хъыгагæн, Фыдыбæстæйы Стыр хæсты рæстæг литерæтурæйы фылдæр хай фесæфт. Фæлæ рæстæгимæ бынæттон интеллигенци архив сног кодта.
Фæстаг хатт дзы бындурон цалцæг цыд 1961-æм азы. Уал азмæ бæстыхай заууатмæ æрцыд. Уымæ гæсгæ йæ хъуыд рацаразын. Райдзаст залтæ, ноггонд интерьер æмæ нырыккон кусæнгæрзтæ. Цалцæджы фæстæ бæстыхай йæ хуыз скалдта. Сси æнцонвадат, ныртæккæ у кæсджыты уарзондæр бынат. Кæй байгом, уый тыххæй чынгуыты фондæн балæвар кодтой 217 ног экземпляры алы жанрты – уырыссаг классикæйæ нырыккон фантастикæ æмæ психологимæ.
Алагиры библиотекæ æрмæст литературæимæ зонгæ кæнынæн нæу. Ацы бынат у горæты культурæйы æмæ ахуырады хæзнадон. Цæрджыты æхсæнадон царды ахсы ахсджиаг бынат, разæнгард сæ кæны ногдзинæдтæ æргом кæнынмæ.
