Куыд æххæстгонд цæуынц полиомиелит æмæ энтеровирусон инфекци парахат кæнын ма ‘руадзыны программæтæ? 60 хуыздæр специалисты, Уæрæсейы фæлхасгæнджытæм цæстдарды управленийы эксперттæ, Цæгат æмæ Хуссар Кавказы федералон зылдты регионты медицинон уагдæтты разамонджытæ архайынц æрвылазон æмбырды. Ацы хатт эпидемиологон уавæр, цæстдард æмæ профилактикæйыл дзурынц Дзæуджыхъæуы. Традицимæ гæсгæ, дыууæ боны дæргъы хатдзæгтæ скæндзысты ацы азы куыстæн. Ног нысантæ сывæрдзысты фидæны азмæ. Сæ фæлтæрддзинадæй фӕхай кæндзысты бæстæйы ног республикæтæй минæвæрттæ дæр.
Цæгат Ирыстоны прививкæгæнæн кампани æххæссы цӕрджыты 95%. Уый у нысангонд регламент — æнæниздзинадхъахъхъæнынады æппæтдунеон куыстуаты стандартмæ гæсгæ. Специалисттæ куыд дзурынц, афтæмæй вакцинаци у полиомелитæн хуыздæр профилактикæ. Тæссаг диагноз арæхдæр сæвæрынц фондз азы онг сывæллæттæн. Нæ республикæйы ацы низæй рынчынтæ бæрæггонд не ‘рцыд. Зæрдæхсаинаг нæу тъæнгты инфекцийы уавӕр дæр.
