Рынчыны фӕдыл гӕххӕтмӕ гӕсгӕ фиддоны бæрц Уæрæсейы дыууæ хатты фæфылдæр уыдзӕн. Паддзахадон думæйы депутаттæ «Уæрæсейы газетæн» куыд радзырдтой, афтæмæй уый у социалон æххуысы системæ фæхуыздæр кæныны мадзæлттæй иу.
Фæллойы министрады информацийыл æнцайгæйæ, “Известия” фыссы, рынчыны фӕдыл гӕххӕтмӕ гӕсгӕ фиддоны æппынфылдæр 2025-æм азы кæй схиздзæн дыууæ мин авд сæдæ сомæй фондз мин авд сæдæ сомы онг. 2024-æм азы та уал фиддон фæфылдæр уыдзæн цыппар мин сæдæ сомы онг. Паддзахадон думæйы депутат Сергей АлтухОв зæрдыл æрлæууын кодта, Пенсион фонд æмæ Социалон фæдзæхстады фонд кæй баиу кодтой, уый фæрцы бӕрӕггӕнӕнты базӕтӕ дæр баиу сты ӕмӕ фиддонты бирӕ хуызтӕ ныр дыууӕ базӕмӕ гӕсгӕ дӕр иухуызон уыдзысты, уый. Депутат куыд загъта, афтæмæй 2025-æм азы онг сæмбырд уызысты, куыстдæтджытæ сæ кусджыты тыххæй æхцайы æххуысæн цы фæрæзтæ фидынц, уыдон. «Фæзындзæн рынчыны фӕдыл сыфтӕм гӕсгӕ фиддонты бæрц фæфылдæр кæныны фадат, сæ хыгъды, æнхъæлцау сылгоймæгты æмæ сывæллоны райгуырды фæстæ фиддонтæ», – бафтыдта Сергей Алтухов. Фæлæ, йæ ныхæстæм гæсгæ, фиддоны бæрц раздæрау аразгæ уыдзæн кусæджы стажæй. Депутат Владимир СипЯгин фæнысан кодта, “нæ паддзахад стыр æргом кæй здахы социалон къабазмæ, æмæ ацы мадзал уымæн æвдисæн”. Йе ‘ргом ма аздæхта, сывæллоны райгуырдмæ чи æнхъæлмæ кæсы, уыцы бинонты, стæй сывӕллонмӕ кӕсыны рӕстӕгӕн фиддонтæ дæр кæй фæфылдæр уыдзысты, уымæ.
