Фестиваль байгом кодтой паддзахадон ансамбль “Алан”-ы кафджытæ. Хореографион конкурс арæзт цæуы ныр дыккаг хатт. Снысан æй кодтой зындгонд кафæг, дæсны педагог Битарты Зауырбегæн . Уæвгæ уыд, ансамбль фыццаг къахдзæфтæ кæимæ акодта, уыдонæй иу. Хореограф æмæ балетмейстер стыр æвæрæн бахаста национ кафты къæбицмæ. Хъаматимæ кафты бындурæвæрæг.
Æмæ канд нæ республикæйы нæ. Бирæ рæтты куыста, йæ хъæппæрисæй фæзынд национ ансамбльтæ, æвæрдта алыхуызон кæфтытæ. Абон дæр рох нæу йе ‘мкусджытæй. Паддзахадон ансамбль “Алан”-ы разамонæг Козаты Зелимханы курдиат дæр раргом кодта Битарты Зауырбег, уыд йæ фыццаг ахуыргæнæг, ныртæккæ дæр ын йæ амынддзинæдтæ зæрдыл дары.
2 номинацийы æмæ 9 республикæйы минæвæрттæ иу сценæйы æвдисынц сæ арæхстдзинад. Кады нысан сын у ахæм æмвæзадыл сæ фæлтæрддзинад равдисын. Кафты бавæрдтой сæ адæмы миддунейы ахсджиагдæр хай. Фæнды сæ аивадмæ æгæрон уарзондзинад равдисын.
Фестивалы жюрийы – национ кафты номдзыддæр минæвæрттæ Цæгат Кавказæй — Цæцæны республикæйы адæмон артист Рамзан Ахмадов, Кæсæг-Балхъары адæмон артист, Уæрæсейы Федерацийы адæмон артист Докку Мальцагов, ансамбль “Кабардинка”-йы аивадон разамонæг Игорь Атабиев.
Битарты Зауырбег баззад æнæ ныййарджытæй, хъомыл кодта сывæллæтты хæдзары Мæскуыйы. Уым цыд балеты скъоламæ æмæ афтæмæ раргом йæ æгæрон курдиат. Хуымæтæг кафæгæй сси дæсны хореграф. Абон Битарты мыггаджы минæвæртты сæ кадджын хистæрæй сты сæрыстыр æмæ фестиваль аразджыты фарсмæ балæууыдысты æхсзыгонæй.
Фестивалы программæ у егъау. Фарон дзы кæд иу номинаци уыд, уæд ныр та сты дыууæ – къæйттæй æмæ хъаматимæ кæфтытæ. Мадзал фæнд кæнынц æрвылазон скæнын, зындгон хореграф Битарты Зауырбеджы ном та – сæнусон.
