Аивадон училищæйы рауагъдонтӕ ӕвдисынц сæ дипломон проекттӕ. Зал байдзаг тыхст, ӕнхъӕлмӕкӕсынад ӕмӕ сабыр сӕрыстырдзинадӕй. Куыстыты ‘хсæн пейзажтӕ, портреттӕ, композицитӕ, нывтӕ. Алы кӕттаг дæр — ахуыры азтӕ ӕмӕ фӕллойы сахӕтты фæстиуæг. Автортӕ уæндонæй æргом кæнынц сӕ хъуыдытӕ.
Ангелинӕйы проект иртасы Александр Родченкойы авангард ӕмӕ сфӕлдыстад. Автор сахуыр кодта архивон ӕрмӕджытӕ ӕмӕ конструктивизмы принциптӕ. Йӕ композицийы баиу сты историон стиль ӕмӕ нырыккон ӕрмӕджытӕ. Уый классикон темӕйӕн дӕтты ног зӕлынад.
Добаты Руслан сарӕзта сӕйрагдӕр куыстытӕй иу. Йӕ ныв баст у училищæйы корпусы рацарæзтимæ. Бындурон цалцӕджы рӕстӕг кусджытӕ цары ссардтой историон ӕрмӕг — революцийы агъоммӕ “штейнгелы агуыридуртæ”, мины бӕрц. Сӕ иуыл баззад фыст “Георгий”. Русланмæ ссарӕггаг нысаны хуызӕн фæкаст. Сарӕзта монументалон ныв Георгий Уæлахизхæссæджы кадӕн.
Русланмӕ ахӕм техникӕты фӕлтӕрддзинад нӕ уыд. Хибарӕй сӕххӕст кодта йӕ хъуыды. Автор сарӕзта егъау сурӕт. Ныв хорз сфидыдта историон бæстыхайы тыгъдады.
Эксперттӕ стыр аргъ скодтой дипломон куыстытӕн. Раппӕлыдысты студенттæ ӕмӕ ахуыргӕнджыты иумӕйаг фӕллойӕ. Зӕгъӕн ис, ӕмӕ рауагъдонтӕ се ‘ппӕт дӕр райстой хорз баллтæ сӕ проектты тыххӕй.
Ӕрыгон нывгӕнджытӕм ӕнхъӕлмӕ кӕсынц ахуыры ног къӕпхӕнтӕ ӕмӕ сфӕлдыстадон фæлварæнтæ. Зæрдæмæдзæугæ бынат агурдзысты сӕ дӕсныйады. Ацы куыстытӕ та уал баззайдзысты училищæйы. Æмæ нывтӕ ног æмæ ногæй зӕрдыл ӕрлӕууын кӕнынц фыццаг цымыдисаг иртӕстытӕ.
Коцойты Кристинæ
