Республикæйы хицауады сæрдар Дзанайты Барис амыдта национ проекттæ Цæгат Ирыстоны куыд æххæстгонд цæуынц, уый фæдыл æмбырд. Ныхасы ма архайдта Цæгат Кавказы федералон зылды Уæрæсейы Президенты æххæстбарджын минæвары æххуысгæнæг Сергей Никитин.
Уый радзырдта цы объекттæ бабæрæг кодтой Цæгат Ирыстоны, стæй цавæр хатдзæгтæ скодтой нæ регионы национ проектты 6 мæйы куыстæн, уый тыххæй. Æмткæй райсгæйæ бантыст мадзæлтты 98% сæххæст кæнын. Æмæ ууыл нæ бауромдзысты. Æнæниздзинад хъахъхъæнынады министрады минæвæрттæ куыд фехъусын кодтой, афтæмæй республикон клиникон рынчындонмæ балхæндзысты компьютерон томограф, Мæздæджы районы рынчындонмæ та магнитон-резонансон томографийы аппарат. Уымæй уæлдай ма ацы аз республикæйы фæзындзæн сывæллæтты нымæцон ахуырады ноджы иу IT-куб, 2 ног кванториумы æмæ 13 рæзты тæлмы. Уæлæмхасæн ахуырады системæйы та ма байгом кæндзысты ноджы 20 мин бынаты.
