Дзанайты Барисæн бавдыстой модулон фысымуæтты проекттæ. Аразынц сæ Уæрæсейы хицауады грантты æххуысæй. Ацы фарстайы фæдыл æмбырды архайдтой нæ бæстæйы экономикон рæзты министрады æркасты чи рамбылдта, уыцы амалхъом адæймæгтæ нæ республикæйæ. Гранттæ рамбылдтой 16-æй. Уыдон бавдыстой сæ инвестицион проекттæ туризмы къабазы. Арæзт та хъуамæ æрцæуой Цæгат Ирыстоны 2023-æм æмæ 2024-æм азты.
Дзанайты Барис куыд фæбæрæг кодта, афтæмæй туризмы рæзт у регионы разамынды фыццагдæр хæстæй иу, æмæ уымæн республикæ дарддæр дæр æппæт хъæугæ æххуысы мадзщæлттæ араздзæн. Чысыл модулон фысымуттæ аразынæн фылдæр фæрæзтæ цы регионтæн радих кодтой, уыцы фондзы æхсæн ис Цæгат Ирыстон дæр. Инвестицион проектты фылдæр хай аразынмæ хъавынц Алагир, Æрæф æмæ Горæтгæрон районы.
