Æмæ та ногæй Ирыстоны зæхмæ Сидахъаты Зауырбег æрласта сызгърина майдан. Аэропорты Уæрæсейы æмæ Ирыстоны тырысатимæ фæсивæд цин кæнынц сæ спортивон кумирыл. Ам сты хистæртæ дæр. Олимпаг хъæзтыты чемпионыл, дунейы 3 хатты чемпионыл æмбæлынц 3 кæрдзынимæ.
Нæ зынгонд æмзæххон спортсмен та ногæй Ирыстоны спортуарзджытæн балæвар кодта æгæрон цины æкъарæнтæ. Сидахъаты Зауырбегæн чемпионат æнцон нæ рауад. Уыдис ын 6 фембæлды. Фаналы размæ рамбылдта Гуырдзыйы, Узбекистаны, Ираны, Сербийы æмæ Азербайджаны спортсменты. Финалы та фембæлд америкаг хæбысæй хæцæг Кайл Дейкимæ.
Хъæбысхæстæй Дунейы чемпионат ацыд Сербийы. Уæрæсейы спортсментæ сæхи хорз бацæттæ кодтой, равдыстой рæсугъд хъæбысхæст. Бæстæйы иугонд командæйы тренер Гуæцæлты Хадзымурат куыд загъта, афтæмæй æппæт бæрæггæнæнтæй разы у, фæлæ уæддæр ма бакусинаг фарстатæ дæр ис.
Чемпионимæ æнæмæнгæй къам сисын. Æвзонг лæппутæн ацы фембæлд у ахсджиаг. Дæтты сын ныфс – мæнæ, Зауырбег, сæхи хуызон ирон лæппу, ам, Ирыстоны зæххыл кæй сырæзти æмæ фæлтæрдта йæ спортивон цæттæдзинад, кæй йын бантыст олимпаг æмæ бирæ æндæр майдантæ рамбулын. Йæ уæлахизтæ йын уынынц æмæ ‘мбарынц, алкæйы бон дæр сæ кæй у нæ зындгонд æмзæххоны бафæзмынын.
