Дзанайты Барисæн уыд вице-премьертимæ æрвылкъуырион кусæг æмбырд

Дзанайты Барисæн уыд вице-премьертимæ æрвылкъуырион кусæг æмбырд. Ныхас цыд фæндаггон инфраструктурæйы объектты арæзтады тыххæй контракттæ бафыссыныл. Куыстытæ æххæстгæнджытæ хъуамæ рæстæгыл райдайой архайын, нысангонд фæткæй иппæрд кæнæн нæй. Ныхас цыд республикæйы хидты уавæр сбæрæг кæныныл дæр, цалцæггæнинаг сæ чи у, уыдонмæ æнæмæнг хъæуы базилын. Уæдæ фæндæгтæн дæр проектон-хыгъдон гæххæттытæ рагацау араздзысты паддзахадон программæты архайынæн. Объектты цæттæдзинад бæрæг кæнынæн дзуапп дæтдзысты профилон ведомствæты разамонджытæ. Арæзтад æмæ архитектурæйы министр Атараты Георгий цæст дары Мæздæджы районы лæбырынæй тæссаг бынæтты уавæр бæрæг кæнынмæ. Уым архайд цæуы Æнæнхъæлæджы уавæрты министрады управленийы минæвæрттимæ иумæ. Æмбырды дзырдтой Беслæны Терчы рахиз былгæрæттæ фидар кæныны мадзæттыл дæр. Уæлдай æргом аздæхтой социалон контракт чи бафыста, уыдонмæ фæкæсыны фарстатæм.