Хæдзары сæрыл — бæлæстæ, пъадвал — фадхъулмæ доны, кæрты — хъуынайы тæф. Дзанайы фырты уынгыл 55-æм хæдзармæ мидæмæ куы бахизай, уæд та цæст фыццаг æрхæцы заууат телтыл. Фатерты рухс ссудз-ахуысс кæны.
Къултæ хъуына æмæ кæлдтытæ. Цæрджытæн æй сæ бон бацалцæг кæнын дæр нæу. Стæй дзы пайдад дæр нæй — фыццаг къæвдайы онг едтæмæ нæ фæлæудзæн. Уымæн дыууæ аххосаджы ис. Фыццаг — зæронд æмбæрзт. Æмбæрзæндуртæ дзы æрхау æрхау кæнынц. Дыккаг — пъадвал. Бахизæн æм нæй.
Æмæ донæн ацæуæн никуыдæм ис. Хъуынайæ уæлдай, къогъотæ æмæ æндæр сасчыты æвзæнтæ. Уыдæттæм кæсгæйæ пырхытæ асфальт диссаг дæр никæмæуал кæсы. Уарынты кæрт æнæхъæнæй цъымара фесты. Донæмбырдгæнæн хæтæлтæ æмæ рухс дæр дзы нæй.
Хæдзар ис разамынддæттæг куыстуат “Партнер”-ы бæрны. Цæрджыты ныхасмæ гæсгæ, уым хъæстытæм се ‘ргом не здахынц. Æндæр бæрнæдтæм дæр сидтысты — бæлвырд дзуапп иуæй дæр нæма райстой.
Адæмы фæдисхъæрмæ се ‘ргом раздæхтой Адæмон фронты. Активисттæ уавæртæ сæхи цæстæй федтой. Хъуыддаг равзарынæй зæрдæ бавæрдтой.
Адæмон фронт архайдзæн уавæртæ фæхуыздæр кæныныл. Цæрджытæ та зæрдæ дарынц, бæрнон ведомствæтæ сæм се ‘ргом кæй раздахдзысты.
