Евгений Ваханговы номыл Уырыссаг академион театры ацыд Михаил Лермонтовы пьесæйы бындурыл арæзт спектакль «Маскарад»-ы æртыккаг равдыст. Йæ режиссер Хъæрджынты Изæбеллæ æмæ актерты къорд удуæлдай куыст бакодтой. Бирӕ репетициты дӕргъы куыстой пьесæйы хъайтарты хуыздæрæй равдисыныл. Æрмæстдæр иу нысанимæ – ногæй та сцымыдис кæнын театрдзауты. Сæ архайды хатдзæгтæн æвдисæн уыд не`сфæлдыстадон къорд дæр.
Фæлтæрд къамӕйхъазæг Евгений Арбенин – бæрзонд,хæрзконд æлдар. Æрмæст йæ цæстæнгасы дæр ирдæй æвдыст цæуынц йæ царды фæндæгтæ. Пьесæйы сæйраг хъайтары ролы хъазы республикæйы сгуыхт артист Чсиаты Роберт. Актеры алы змæлдмæ дæр лæмбынæг кæсы режиссер Хъæрджынты Изабеллæ.
Йæ уайдзæф сæ разæнгард кæны хуыздæрæй-хуыздæрмæ тырнынмӕ. Уæдæ йæ æппæлæн ныхæстæн та уæлдай аргъ кæнынц. Уыдон бынтон æндæр ад кæнынц. Йæ хъуыдымæ гæсгæ, спектакл «Маскварад»-ы репетици йæ равдисыны агъоммæ хъуамæ суа æнæаипп.
150 азы размӕ фыст, Михаил Лермонтовы драмæ ныр дæр ма у актуалон, ныры цардмæ хæстæг. Спектакль ахуырст у алыхуызон цардыуагон æнкъарæнтæй. Дзырдæн зæгъæм, уарзондзинад, æнувыддзинад, æнæрвæссынад, мæнгарддзинад. Ис дзы, уæдæ, интригæ дæр.Фæлæ фæнысан кæнын хъæуы уый, æмæ кæд уацмыс классикон у, уæдæр иу хаттæй иннæ хатмæ театрдзауы размæ райгом кæны царды ног фæзилæнитæ.
Пьесæ «Маскарад»-ы премьерæ равдыстой фарон теары юбилейы бонмæ. Ныр æвдыст цæуы æртыккаг хатт. Уæвгæ, адæмы зæрдæмæ кæй фæцыд, уый гуырысхойаг нæу. Ныр дæр та залы къах бавæрæн дæр нæ уыд.
