Дзæуджыхъæуы администрацийы сæргълæууæг Милдзыхты Вячеслав æмæ Цæгат Ирыстоны паддзахадон унивеситеты ректор Огъуаты Алан æрдзырдтой Фæскомцæдисон паркы аивгæнæн куыстыл. Æмбырды ма бацархайдта горæты арæзтад æмæ архитектурæйы управленийы разамонæг Хъараты Аслан дæр. Ацы азы июлæй парк ис горæты администрацийы бæрны. Рацарæзтмæ цæттæгæнæн мадзæлттæ ныридæгæн райдыдтой.
Милдзыхты Вячеслав рахаста фæндон, цæмæй цæрджытæн дæр сæ бон уа сæ хъуыдытæ зæгъын, рацарæзты фæдыл. Огъуаты Аланы ныхстæм гæсгæ, университеты сæйраг бахизæн фæнд кæнынц Пушкины номыл уынгмæ, фæскомцæдисон паркы ‘рдæм раивын. Уый фенцондæр кæндзæн Ватутины номыл уынджы транспорты цыд. Аивгæнæн куыстыты проект цæттæ уыдзæн фидæны азмæ.
