Æвирхъау цауы бынатæй фыццаг кадртæ. 9 майы райсомы 4 сахаты. Æнæнхъæлæджы уавæрты министрады кусджытæ архайынц Фарныхъæуы культурæйы хæдзары зынгсирвæзт аххуысын кæныныл. Фæлæ арты æвзæгтæ ног тыхтимæ абухтой. Цыбыр рæстæгмæ актон зал сæ ахæсты бацис.
Ныртæккæ актон зал æмæ культурæйы галуан мæнæ ахæм уавæры сты. Ацы бæстыхай иннæтæй тынгдæр баййæфта хъыгдард. Зынгсирвæзты рæстæг басыгъдысты цар, бандæттæ, арт суанг сценикон кусæнгæрзтыл дæр нæ бацауæрзта. Хорз уыд æмæ уыцы афон культурæйы галуаны адæм нæ уыд. Специалисттæн бахъахъхъæнын бантыст æрмæст бæхстыхайы административон хай. Æнæхъæнæй баззадысты культурæйы хæдзары костюмты уат æмæ архив. Ныртæккæ иртасынц фыдбылызы аххосæгтæ. Уыцы изæр Фарныхъæуы сыстад тыхджын дымгæ, их æмæ тæркъæвдаимæ. Хъæуы хицау Гæлуаты Зауырбеджы ныхæстæм гæсгæ, гæнæн ис æмæ боныхъæды аххосæй хъыгдæрд баййæфтой электрон тыхы телтæ.
Культурæйы галуанæн хъæздыг истори ис. Бæстыхай йæхимæ ‘лвæста бынæттон цæрджыты. Ссæдз азæй фылдæр афтид уыд, фæлæ йæ фондз азы размæ байгом кодтой бындурон цалцæджы фæстæ. Ацы цауыл хъæуы кæстæртæ тынг цин кодтой. Алыхуызæн къордты архайдтой 150 сывæллоны. Суанг ма сæм хæстæгдæр хъæуты фæсивæд дæр цыдысты.
Æрдзон фыдбылыз цы зиан æрхаста, уый нырма хъæуы банымайын. Фæлæ ныртæккæ дæр бæрæг у культурæйы галуаны рацарæзтæн бахъæудзæн 50 милуан соммæ хæстæг. Æмæ бæстыхай рацараздзысты. Специалисттæ кусын райдыдтой проектон-хыгъдон документтыл. Гæнæн ис, æмæ объект ацы аз баххæсой национ проекттæй иумæ.
Ахуыртæ иу бон дæр не ‘рлæууыдсты. Цалынмæ культурæйы галуан ног кæной, уæдмæ фæсивæд архайдзысты Фарныхъæуы скъолайы. Районы администрацийы нын куыд радзырдтой, афтæмæй хæстæгдæр рæстæг самал кæндзысты æмбæлгæ кусæнгæрзтæ. Уавæртæ культурæйы хæдзарæй цауддæр сты, фæлæ районы разамынд зæрдæ æвæры къуылымпытæ рæстæгмæ кæй сты. Бындурон рацарæзты фæстæ хъомылгæнинæгтæ æрбаздæхдзысты ноггонд бæстыхаймæ.
