Фатерты хицӕуттӕ хъуамӕ коммуналон лӕггӕдтӕн фидой, куы сӕ самал кӕной, уӕдӕй фӕстӕмӕ

Фатерты хицӕуттӕ хъуамӕ коммуналон лӕггӕдтӕн фидой, куы сӕ самал кӕной, уӕдӕй фӕстӕмӕ. Ногарӕзт бæстыхæйтты та — цæрæнуат райсыны акт бафыссыны фӕстӕ. Уыимӕ абоненттӕн сæ нымайæнтæ хъуамӕ уой ӕвӕрд ӕмӕ пломбӕгонд. Ахӕм уавӕры хæрдзтæ нымад æрцӕуынц ӕцӕг фӕлхасмӕ гӕсгӕ. Доны хардз куы нӕ уа, уӕд дзы нымады дӕр ницы уыдзӕн. Арæхдæр аразджытӕ фатертӕ раттынц ӕвӕрд прибортимӕ, хицӕутты ма фæхъæуы ӕрмӕст донбарӕнтӕн пломбæтæ сæвæрын. Ацы лӕггад Водоканал лӕвар кæны, курдиат бадӕттыны фӕстӕ. Иуӕй-иу абоненттӕ афтӕ хъуыды кӕнынц, зӕгъгӕ, фатеры цалцӕг куы цӕуа, уӕд донӕн ӕхца фидын нӕ хъӕуы. Фӕлӕ ресурсон организацийӕн йӕ бон нӕу сбӕрӕг кӕнын, фатеры ӕцӕгӕй цы цӕуы, уый. Уымӕ гӕсгӕ фиддон нымайынц ӕрмӕст официалон бӕрӕггӕнӕнтӕм гӕсгӕ, ныры закъонӕвӕрынады фæлгæты.