Ам та ныридæгæн чи бахус, ахæм цыхт. Вæййы цалдæр хуызы. Зæгъæм, хæндыджы цыхт, цæхджын, тынг парахат у адæмы ‘хсæн. Ацы лыстæгдзинæдтæ дзурынц Мæздæгæй скъоладзаутæн. Сæрмагондæй куыстуатмæ ссыдысты экскурсийы, цæмæй феной куысты къæпхæнтæ се ‘ппæт дæр.
Уый та у экскурситы сæйраг нысан — фæсивæдæн баххуыс кæнын фидæны дæсныйад равзарынæн æмæ уыцы-иу рæстæг республикæйы кадрты дефицит баххæст кæнын. Скъоладзаутæн равдыстой кондады æппæт цехтæ дæр. Уыимæ сæйраг бæстыхай дæр. Уым бацæттæ кæнынц ахсджиагдæр продукттæй иу – æхсыр. Ахуырдзаутæн радзырдтой урссаг къоппыты ныккæныны размæ цы къæпхæнтæ ацæуы, уый тыххæй. Фыццаджы дæр пастеризаци — схъарм æй кæнынц æмæ дзы афтæмæй æппæт æвзæр бактеритæ дæр фесафынц. Дарддæр бактофигурировани æмæ гомогенизаци. Процедурæйы руаджы æмхуызон адих вæййы æхсыры сой, дарддæр та йæ ахицæн кæнынц сойады проценттæм гæсгæ. Заводы куыд регионы бирæ æндæр куыстуæтты, афтæ ам дæр нæ фаг кæны кусджытæ. Уымæ гæсгæ, эксурситæ сты пайда.
Комбилеевскæйы дыккæгæм скъолайы ахуырдзаутæн та экскурси сарæзтой æлыгæй архайыны æрмадзы. Бацæттæ сын кодтой дæсныйадæвдисæг ахуыр дæр. Æлыгимæ куыд архайын хъæуы, радзырдтой сын процессы лыстæгдзинæдты тыххæй, сарæзтой гыццыл къустæ.
Донимæ архайын хъæуы æппынæдзух, уымæн æмæ æнæ уымæй дзаумайыл къуыбæрттæ фæзындзæн. Æмæ йæ бахъæудзæн ногæй аразын. Дæсныйадæвдисæг ахуыр фæсивæды зæрдæмæ фæцыд. Процесс сабыр кæны адæймаджы миддуне. Арæх вæййы терапийы хуызы дæр. Ахуырдзаутæй кæцыдæртæ сæхицæн фидæны дæсныйад ныридæгæн дæр равзæрстой.
Сывæллæттимæ ныхас кодта керамист Бæцойты Каринæ. Æргомæй сын радзырдта дæсныйады сусæгдзинæдты тыххæй æмæ сæ æрбахуыдта ноджы иу дæсныйадæвдисæг ахуырмæ. Фæсивæд цымыдисæй хъуыстой, лæвæрттой фæрстытæ.
Дæсныйадæвдисæг ахуыртæ æмæ экскурситæ аразынц “Билет в будущее” федералон проектмæ гæсгæ. Йæ куратор профессионалон цæттæдзинады центр. Сæйраг нысан — сывæллæттæн равдисын алыхуызон гæнæнтæ. Архайджытæн ис квотæйы системæ. Цæмæй йæ райсай, уый тыххæй хъæуы официалон платформæйы хи регистраци скæнын.
Фæлварæнтæ цæуынц республикæйы куыстуæтты. Ацы аз дзы архайдтой 875 скъоладзауы, платформæйы срегистраци кодтой 7 мин адæймагæй фылдæр. Программæ æппынæдзух ивынц æмæ хъæздыг кæнынц. Уый ‘руаджы фылдæр кæндзысты фидæны специалисттæ дæр.
