Цалдæр мæймæ Горæтгæроны районы Цæрикъаты Викторы фермерон куыстуат райдыдта 30% хуыздæр архайын. Уый та уый тыххæй, æмæ йæ сифтонг кодта нырыккон дуцæн техникæйæ. Балхæдта йæ апрелы равдыст «Быдыры фæз»-ы фæстæ. Хуымæтæджы нæ. Æхсыры хæрзхъæддзинад дæр фæхуыздæр ис. Фермерон хæдзарады ног фæрæзты тыххæй – нæ уацхæссæджы æрмæг.
Сахат æмæ æрдæгмæ 200 хъуджы æрдуцын. Ахæм хæслæвæрд иу раздæр æнæхъæн бригадæйæ æххæст кодтой. Ныр та ацы куыст автоматизацигонд у. Сæрмагонд кусæнгарзы фæрцы æхсыр цæуы хицæн уазалгæнæнтæм.
Зæгъæн ис æмæ адæймагæн ам бирæ куыст нæй. Æхсыры 200 литр куы рымбырд вæййы, уæд мæ хæс у æмбæлгæ кънопкæйыл ныххæцын. Программæ дарддæр алцыдæр йæхæдæг амоны. Адæймаджы архайд дзы бирæ хъуамæ ма уа.
Нырыккон ифтонггæрзтæй Цæрикъаты Виктор йæ фермæ æрæджы сифтонг кодтой. Куыд зæгъы, афтæмæй рагæй фæндыд автоматикон системæтæм гæсгæ кусын. Фæлæ йæ куыд сæххæст кæнын хъæуы, уый нæ зыдта. Хорз ахъаз ын фæци акци «Быдыры бон». Уым базонгæ нырыккон кусæнгæрзты хуызтимæ. Хойраг æмæ хъæууон хæдзарады министрады æххуысæй сæ балхæдтой.
Хъæууон хæдзарадон ведомствæйæ куыд хъусын кæнынц, афтæмæй кооператив «Алания» иунæг æвдисæн нæу. Нырыккон техникæ æвæрынц æндæр фермæты дæр. Æппæты зындæр уыд хæрзхъæд техникæ уæйгæнджыты æмæ йæ чи рбаласа, ахæм адæм ссарын.
Профилон организацитæ æмæ ведомствæтæ дарддæр архайдзысты хъæууон хæдзарады кусджыты разæнгард кæныныл. Тагъд рæстæг Цæгат Ирыстоны скусдзæн фæндæгты картæ дæр.
Пелиты Сабинæ
