Фыдыбæстæйы Стыр хæсты ветеран, Сталинграды тохы архайæг, Украинæ æмæ Европæ фашисттæй уæгъдгæнæг Цалиты Сафарби абон бæрæг кæны йæ 100 азы юбилей. Сафарби бирæ азты фæкуыста йæ райгуырæн хъæу Дур-Дуры советы æмæ колхозы. Æхсæнадон куысты дæр æппынæдзух уыд фыццаг. Зындзинæдтæй никуы тарст, куыстæй дæр йæхи никуы бамбæхста. 100-аздзыдæй ма хæдтулгæ дæр тæры! Йæ гуырæнбоны фæдыл ын арфæ ракодта республикæйы сæргълæууæг Сергей Меняйло. Загъта йын бузныг йæ хъæбатырдзинады тыххæй.
Хæст цæхæр ныгуылæны куы ссыгъд, уæд Цалиты Сафарби нырма скъолайы ахуыр кодта. Йæ азтæм дæр нæ фæкаст, афтæмæй барвæндонæй ацыд тохы быдырмæ. Хъахъхъæдта йæ Райгуырæн бæстæ суанг Уæлахизы бонмæ. Йæхи æвдыста хъæбатырæй. Зæгъæм, Краматорскы схæцын кодта пулеметæй æхсæн æртæ бынаты, уæзласæн хæдтулгæ, 30 фашистæн та сæ адзал æрцæуын кодта. Хъазуатон кæй уыд, уый тыххæй Сафарбийы схорзæхджын кодтой Фыдыбæстæйы Стыр хæсты фыццаг æмæ дыккаг къæпхæнты ордентæй. Фæстæдæр та ма йын саккаг кодтой æвзист дзуар æмæ майдан «За боевые заслуги». Хæсты фæстæ Цалийы-фырт райдыдта кусын хъæууон советы. Йæ рæстæг æмæ йæ хъаруйыл нæ ауæрста. Фæндыд æй йæ райгуырæн хъæу Дур-Дуры цæрджытæн хуыздæр царды уавæртæ саразын.
Сафарбийы бирæ нæ бахъуыд, цæмæй йæ хъæуы цæрджытæн дæнцæгæн хæссинаг суа. Цыбыр æмгъуыдмæ йæ равзæрстой Дур-Дуры æххæстгæнæн комитеты сæрдарæй. Уый фæстæ та – партийы комитеты секретарæй, стæй колхоз «Октябры 50 азы» сæрдарæй. Ахæм арæхстджын разамонæг æмæ коллективы æнтыстджын куысты руаджы колхоз раззагдæр бынæттæ ахста æрмæст районы нæ, фæлæ ма республикæйы дæр.
Хæсты ветеран дарддæр дæр архайы, йæ райгуырæн хъæуы Уæлахизы парчы райрæзтыл. Йæ сæр дзы бæрзæндты хæссы. Парк ацы ран фæзынд Сафарбийы хъæппæрисæй. Хæсты быдыры йæхи цæстæй федта, йе ‘рдхæрдтæ иугай куыд сæфтысты, уый. Бафæндыд æй сæ нæмттæ æмæ истори æнусон скæнын.
Цалиты Сафарбийы ном ма ссарæн ис Уæрæсейы рекордты чиныджы. У нæ бæстæйы æппæты карджындæр шофыр. 100-аздзыд нæлгоймаг хæдтулгæ тæры ныфсджынæй. Æппынæдзух йæ фæндаг ракæны аллейæйыл дæр. Ам æрымысы йæ хæстон æмбæлтты.
Абон Цалиты Сафарби йæ бинонты æхсæн бæрæг кæны йæ 100 азы юбилей. Ис ын 4 сывæллоны, йæ цоты цот сты 12, уæдæ уыдоны цот та ма 10. Æрвылаз иумæ æрбамбырд вæййынц æмæ фæхъусынц сæ хистæры хæстон æмæ царды цаутæм. 100 азмæ та дзуринæгтæ куыд нæ уыдзæн?!
Биджелты Бертæ
