Ацы сахат республикæйы цæрджытæ, Мидхъуыддæгты министрады уæнгтæ, ветерантæ æмæ æхсæнадон организациты уæнгтæ æрбамбырд сты Барбашовы фæзы. Мысынц, хæстæй чи нал сыздæхт, уыдоны нæмттæ. Нæ уацхæссæг Гогаты Марат дæр уым ис. Ныртæккæ мемæ рацæудзæн комкоммæ эфирмæ æмæ бынаты цы хабæрттæн у æвдисæн, уый радзурдзæн.
Бузныг, Бертæ! Ныртæккæ мах стæм Барбашовы фæзы ног мемориалы цур. Ам æмбырд кæнынц нæ республикæйы Мидхъуыддæгты министрады уæнгтæ. Цалдæр минуты фæстæ ам райдайдзæн акци Свеча Памяти. Фыдыбæстæйы Стыр Хæст цы бон райдыдта — 22-æм июны — уый агъоммæ. Ацы аз ыл сæххæст уыдзæн 77 азы. Уыцы бон та никæмæй ферох уыдзæн. Тугкалæн хæст ахаста 27 милуан адæймаджы цардæй фылдæр. Мысæн бон, номарæн мадзæлттæ аразынц æгас Уæрæсейы. Ам дæр, бæрнон кусджытæ сæ номарæн хæс сæххæст кæндзысты. Ныртæккæ цы кадртæ уынут, уыдон систам чысыл раздæр, цалынмæ бынтон не `рталынг, уæдмæ. Адæм судзынц цырæгътæ — равæрдзысты дзы дзырд «Помним». Цыртдзæвæнмæ цæуынц дидинджытимæ æмæ веноктимæ. Хъайтарты Аллеяйы, алы тырысайы цур дæр лæууынц мидхъуыддæгты кусджытæ, сæ къухы цырæгътæ афтæмæй. Комплексмæ бахизæнты æрлæууыдысты æфсæддонтæ — кады караулы. Æфсæддон техникæ кæм ис, уым та хъуамæ æрбынат кæной кадджын уазджытæ. Се `хсæн уыдзысты Цæгат Ирыстоны Мидхъуыддæгты министр Михаил Скоков, Ветеранты Советы сæрдар Къаболаты Солтан, Петр Сазыкин, Æхсæнадон советы сæрдары хæдивæг Чеджемты Сергей æмæ æндæртæ.
Цæгат Ирыстонæй Райгуырæн бæстæ бахъахъхъæнынмæ ацыдысты 90 мин адæймагæй фылдæр. Се рдæг сæ фыды уæзæгмæ нал сыздæхтысты. 79 не мзæххонтæй хæссынц Советон Цæдисы хъæбатыры ном. Уыдоны кадæн архайджытæ 1 минут æдзæмæй алæудзысты. Уый размæ та уал сын равдисдзысты киноныв «Завтра будет война». Зæгъын ма хъæуы уый, æмæ ахæм номарæн акци саразынц алы аз дæр. Бæргæ, нæ эфир фылдæр рæстæг куы ахсид, уæд æй бæлвырддæрæй равдисиккам. Бертæ, мæ зæгъинæгтæ загътон, дарддæр эфир — дæ бар.
