Алыккаты Зинӕйӕн диагноз сӕвӕрдтой бирӕ азты размӕ. Зæнæгдоны фыдрæсыд хæццæ кодта мисындзӕджы онг. 2019 азы йын скодтой ахсджиаг операци, оргӕнтӕ систой. Йе 6 химиотерапийы курсы сылгоймаг хъуыды кӕны абон дӕр. Буар æгасæй дæр рысти, уӕлдайдӕр та стджытӕ. Фӕлӕ процедурӕтӕ ӕнӕмӕнг хъуыдысты ӕмӕ ӕххуыс кодтой. Абон амбулаторон онкологион ӕххуысы центрмӕ консультацимӕ ӕрбацыд фыццаг хатт.
Раздӕр химиотерапи ацӕуӕн уыд ӕрмӕстдӕр рынчындоны. Ныр процедурӕ ӕнцонвадат у фыццаг поликлиникӕйы центры дӕр. Уый бирӕ фенцондӕр кӕны хос кӕныны хъуыддаг. Онкологион низтæ парахат кæнынц. Цӕгат Ирыстоны дӕр рынчынтӕ дзӕвгар ис. Ӕппӕты сӕйрагдӕр – низ афоныл бафиппайын, зӕгъынц специалисттӕ. Уымӕ гӕсгӕ, рак гуырысхойаг куы вӕййы, уӕд пациенты арвитынц профилон дохтыртӕм. Ӕмӕ адӕймагӕн хъуамæ йæ размæ цæлхдуртæ ма ‘взæра.
Ацы ахсджиаг профилактикон куыст фадат дӕтты рынчыны ӕнӕниздзинады динамикӕ сбӕрӕг кӕнынӕн ӕмӕ, аиппытӕ куы сбӕрӕг уой, уӕд ӕвӕстиатӕй баххуыс кӕнынӕн. Ноджы ма центры кæнынц низы ныхмӕ терапи. Пациентты æрбарвитынц Республикон онкологон диспансерæй, æнæмæнг медицинон фæдзæхстады полисмӕ гӕсгӕ. Фарон ахӕм процедурӕ ацыд 400 адӕймагӕй фылдӕр, афæдзы райдинӕй та 73 адӕймаджы.
Центр æмархайд кæны республикон онкологон диспансеримӕ. Алы рынчынӕн дӕр консультаци скӕнынц. Дохтыртӕ архайынц хӕрзхъӕд ӕмӕ, сӕйрагдӕр, афоныл ӕххуыс кӕныныл. Уымӕ гӕсгӕ ахсджиаг у æнӕниздзинадмӕ цӕст дарын ӕмӕ диспансеризаци кӕнын. Специалисттӕ зӕрдыл ӕрлӕууын кӕнынц, низ цас раздӕр рабӕрӕг уа, уыйбæрц ӕнцондӕр у йæ дзӕбӕх кӕнын.
