“Фыццæгты змæлд”-имæ æмгуыстады фарстатыл ныхас кодтой республикæйы координацион советы æмбырды. Амыдта йæ Сергей Меняйло. Ныхас дзы цыд ацы афæдзы фыццаградон здæхтытæ æххæст кæныныл. Уый тыххæй республикæмæ ссыд «Юнармийы» сæйраг штабы хицау Владислав Головин æмæ Фыццæгты змæлды разамынды сæрдары хæдивæг – Ксения Янова. Сергей Меняйло куыд фæнысан кодта, афтæмæй Фыццæгты змæлд у, æбал кæмæн нæй, ахæм фæз, иумæйаг хæстæ баххæст кæнынæн æнгом кæны фæсивæдон организациты. Уæлæмхасæн ахуырады ног здæхты фæдыл республикæйы сæргълæууæг рахаста уынаффæ скъолаты æвзонг æфсæдты кадетон кълæстæ скæнын. Советы æбырды фæнысан кодтой, Фыццæгты змæлды федералон мадзæлтты архайгæйæ, Ирыстоны фæсивæд æвдисынц сæ хъомылад, культурæ æмæ æгæрон курдиæттæ. Фидæны проектты тыххæй радзырдта Регионалон хайады советы сæрдар Къесаты Ирыстон. Активисттæ цæттæ кæнынц бацархайынмæ æфсæддон-патриотон хъазты финал “Зарница»-йы Æппæтуæрæсеон проект-фестиваль “Российская школьная весна”-йы, “Сабибонтæ æмæ æвзонгады” фестивалы, фыццаг æххуысы чемпионаты финалы, уыимæ Дронтимæ архайды æппæтуæрæсеон чемпионаты “Пилоты будущего”-йы. Уыймæй уæлдай ма ацы аз æппæт муниципалитетты дæр ацæудзысты “Нарты хъæзтытæ”, национ-культурон æхсæнадты архайдимæ. Къесаты Ирыстон куыд фæнысан кодта, афтæмæй, мадзæлттæ баст уыдзысты Иудзинады афæдзимæ, бæстæйы президент æй снысан кодта 2026 азы.
