Ныр фидæны дæсныйад равзарын бирæ фенцондæр уыдзæн. Партæйы уæлхъус-иу базондзæн скъоладзау архитектурæ æмæ инженеры хъуыддаджы тыххæй: хахнывтæ раст кæнын, хæдзары хуызæг аразын. Ног программæйы фæрцы ахуыргæнинæгтæ исдзысты бындурон зонындзинæдтæ.
Фидæны специалисттæ сæ дæсныйадмæ фыццаг къахдзæф акодтой Атарты Георгиимæ. Ног профилон кълæстæ байгом кæныны фæнд вице-премьермæ фæзынд. Ныртæккæ проект райдайæн къæпхæныл ис. Бафæлвардзысты йæ 36-æм скъолайы. Октябры 7-æм “В” къласы ахуырдзаутæ ног дисциплинæтæ базондзысты.
Андрей Барбаковмæ ныридæгæн дæр бирæ фæндтæ ис. Фидæны хъуамæ суа архитектор. Скæндзæн хæдзар æмæ хæрзвадат хъазæн фæзы проекттæ. Æмæ йын ацы хъуыддаджы ног профилон кълæстæ феххуыс уыдзысты. Хахнывкæнынады уроктæй уæлдай, проекты ис техникон дисциплинæтæ. Бафтаудзысты йæм инжерерон графикæ æмæ 3Д-хуызæгтæ дæр.
Сывæллæттæ, кабинеттæй уæлдай, архайынц куыстадон фæзуатыл дæр. Агуыридурæй амайын январы райдыдтой. Уый тыххæй сын Арæзтадон техникумы сæрмагонд бынат ис. Студенттæ дæр сын сæ зонындзинæдтæ не вгъау кæнынц. Æвзонг аразджытæ техникуммæ абалц кæнынц къуыри иу хатт. Фыццаг уал сын инструктаж скодтой, радзырдтой амайыны сæйраг æууæлты тыххæй, æдасдзинады домæнтæ фæбæрæг кодтой. Æрмæст уый фæстæ райдыдта практикæ.
Уый нырма профилы агъоммæ кълас у, хъæппæрис æххæстæй бафæлвардзысты иннæ аз. Абон та фенæн ис, фæсивæд кусæг дæсныйæдтæм се ‘ргом кæй аздæхтой. Атарты Георгий йæхæдæг куыд фæбæрæг кодта, афтæмæй сæйраг хæс у арæзтады къабазы специалистты ног фæлтæр бацæттæ кæнын, цæмæй кадрты фарста иуварсгонд æрцæуа.
