Зæрдæмæдзæугæ, хæрзæфснайд къæбицы дзаумайæ ма æрмæст фæнык аззад. Иууылдæр арты амæттаг баисты. Гæджитыл ахæм бæллæх фыццаг хатт не ‘рцыд. 17 азы размæ та сæ хæдзары иннæ хай басыгъд.
Фатимæ раджы сыстад уыцы бон. Раст цыма æмбæрста — æвирхъау цау æрцæудзæн. Куыддæр йæ уатæй рахызт, афтæ бамбæрста — судзы та сæ хæдзар. Цалдæр минутмæ арт царыл апарахат, дарддæр уайтагъд æгас хæдзарыл дæр. Йæ фырты райхъал кодта. Иумæ æттæмæ ралыгъдысты. Документтæ рахастой, хъæугæ дзауматæй бирæ ницы сси аирвæзын кæнын сæ бон.
Зынгвæдисæттæ уайтагъд æрбахæццæ сты. Фæлæ сыгъд ахуыссын кæнын æнцон нæ уыд. Сыхæгты хæдзармæ дæр ма ахæццæ. Сæ амондæн, бирæ ницы бахъыгдæрдта. Ныртæккæ Гæджитæ цæрынц сæ зæронд хæдзары, раздæр чи басыгъд, уым. Цыппар адæймаджы — иу агъуысты.
Ацы зын уавæры æвæгæсæгæй нæ баззадысты. Куыд 17 азы размæ, афтæ абон дæр сыхæгтæ сæ фарсмæ æрбалæууыдысты. Зымæгмæ бирæ нал хъæуы. Бинонты рæстæгмæ бынат уазæлтты рæстæг цæрынæн нæ бæззы. Зæрдæ дарынц, сæ уавæрмæ сын Рахизфарсы районы æмæ республикæйы разамынд се ‘ргом кæй раздахдзысты æмæ сæм кæй фæкæсдзысты.
