Ленинграды 77 азы размæ цы фыдæвзарæнтæ уыдис, уыдон ныр дæр ма нымад сты Фыдыбæстæйы Стыр хæсты тугæрхæм цаутæй иуыл. Абон дæр ма не `хсæн ис, йæ сабибонтæ хæстон цæхæр æмæ æрхъулайы амæттаг кæмæн баисты, уыдон. Сæ иу – нæ программæйы дарддæры æрмæджы хъайтар Галина Семенюк. Райгуырд 1942-æм азы. Йæ цардуалдзæгыл бацин кæнын ын нæ бантыст, йæ фыццаг бонтæй фæстæмæ фашистон æрдонгты къухмæ кæй бахауд, уый тыххæй. Абон æм уазæгуаты фæзындысты фæсивæды минæвæрттæ. Цæстытæ доны кæмæй разилынц, ахæм хабæрттæ сын ракодта.
Галина Семенюк райгуырд 1942-æм азы Ленинграды. Йæ фыд Ульян – тæхæг, Испанийы хæсты архайæг, фæмард госпиталы йæ чызджы райгуырды хæдразмæ. Сывæллоны мад Заретæ уæд куыста æвсæнвæндаджы хæдзарады. Йæ цоты схъомыл кодта иунæгæй. Ныббырстытæ куы райдыдтой, уæд мад йæ дыууæ чызгимæ иннæ цæрджытимæ æмбæхст уæрмы.
1942 азы хъызт зымæджы Галинæйы æд хо æмæ мад арвыстой Кировы облæстмæ. Уым фесты цалдæр мæйы. Чызджы мад сфæнд кодта фæстæмæ æрхъулайы ист Ленинградмæ раздæхын. Уым баззадысты сылгоймаджы цыппар æфсымæры æмæ йæ хæлæрттæ. «Кæд мæлгæ, уæддæр иумæ, кæд цæргæ, уæд кæрæдзийæн æххуыс кæнгæйæ», – дзырдта Галинæйы мад. Фашистты къæлæтты фесты 800 боны.
Ацы ныхæстæм чи байхъуса, уыцы фæсивæд нæм ис. Зæгъæм, æрыгон æфсæддонтæ æххæст кæнынц иртасæн-агурæн куыстытæ. Мадзæлтты сæйрагдæр хæс – Фыдыбæстæйы Стыр хæстимæ цауты тыххæй истори бахъахъхъæнын, уыимæ ма семæ базонгæ кæнын рæзгæ фæлтæры дæр. Æнæмæнг, сæ радзырдты бынат разындзæн Галина Семенюкы хуызæн мингай бинонты тыххæй хабæрттæн дæр. Хъуамæ ахæм фыдбылыз дуне макуыуал фена.
