Аразджытӕ къултæ сæрст фесты. Ныртӕккӕ æххæст кæнынц аивгæнæн куыстытæ. Сæрмагонд хæццæтæ змæнтынц, ахорынц къултæ æмæ цартæ. Тыргъты сӕвӕрдтой плиткӕ. Объекты ӕрвылбон фæллой кæнынц 20 специалисты онг.
Горӕтгӕрон районы культурӕйы галуан сног кӕнын рагæй хъуыд. Бæстыхай сарæзтой 1982 азы. 2025-ӕм азы та бавнӕлдтой бындурон цалцӕгмæ.
Уыимæ ма сног кодтой ӕппӕт инженерон коммуникацитӕ, уӕлхӕдзар. Бæстыхайы фӕзуат у 3 мин квадратон метры онг. Бынаты бирæ агъуыстæ ис — уыдзысты уæрæх, фæзындзæн дзы конферен-зал алыхуызон мадзæлттæн.
Егъау цаутӕн фæзуат нысангонд æрцыд. Хъӕугӕ уавӕртӕ сараздзысты концертон залы дӕр. Уыдзæн дзы 540 бынаты.
Кӕд цалцӕг цæуы, уӕддӕр культурӕйы галуаны кусджытӕ дарддӕр фæллой кæнынц, сывӕллӕттӕ та ахуыр кæнынц ӕндӕр кусӕндӕтты къордты. Фӕлӕ уый рӕстӕгмӕ у, рацарæзты фӕстӕ хъомылгӕнинӕгтӕн сӕ бон уыдзӕн сӕ уарзон агъуыстмӕ раздӕхын. Ӕдӕппӕт культурӕйы галуаны ис 18 клубы сконды.
Бындурон цалцӕг фӕуынмӕ хъавынц ӕмгъуыдӕй раздӕр, бæлвырддæр дзургæйæ та уалдзæджы. Егъау рацарæзт цӕуы национ проект “Бинонтӕ”-йы фӕлгæты. Уыцы нысантæн радих кодтой 119 милуан сомы. Горӕтгӕрон районы культурӕйы галуан алкæддæр уыд бынӕттон цӕрджытӕн уарзон бынат. Ӕмӕ йӕ байгоммӕ æхсызгонæй ӕнхъӕлмӕ кӕсынц.
Лидия Цахилова, Виктория Габолаева
