Хъæрмуæтты комплекс байгом кодтой ивгъуыд аз, фæлæ ныридæгæн æвдисы хорз бæрæггæнæнтæ. Хæрзад пъæмидортæ ам æрзайын кæнынц æнæхъæн афæдз. Специалисттæ уый тыххæй сарæзтой нырыккон уавæртæ, æмбæлгæ температурæ æмæ донпырхгæнæн системæ. Кондады 600 кусæгæй фылдæр. Фæллой кæнынц хъæрмуæтты 8 секцийы, алы фæзуат дæр дзы у 5 гектары.
Абоны бонмæ ам ис пъæмидорты хуыз. Агуат, вентиляци, иууылдæр сты автоматикон. Промышленносты архайджыты æмæ амалхъом адæмы уæрæсейаг цæдисы Президент бынаты аргъ скодта халсарты хæрзхъæддзинадæн.
Цæдисы президентимæ фембæлды республикæйы амалхъомтæ ныхас кодтой ахсджиаг фарстатыл. Хицауады уæнгтимæ æркастысты энергетикон компаниты цæттæдзинадмæ Цæгат Кавказы регионы инвестпроекттæ баххæст кæныны фæдыл. Раззагдæр темæтæй ма иу уыд уадзæн пункт Уæллаг Ларсы куыст æмæ уæзласæн транспорты электронон рады гæнæнтæ æмæ хъомыс.
Уымæй уæлдай ма Цæгат Кавказы Федералон зылды цæдисы хайæдты Координацион советы куысты фæлгæты ацыд фыццаг информацион сесси бизнесы минæвæрттæн рекламон инструментты фæдыл. Мадзал сси фæлварæн проект, йæ нысан у регионы чысыл æмæ астæуккаг бизнесы райрæзт.
Мадзалы архайджытæн фадат уыд нырыккон нымæцон гæнæнтæ базонын, уыдон æххуыс сты бизнесы райрæзтæн, продукци æмæ лæггæдтæ парахат кæнынæн.
