Æбиты Валерий фыццаг хатт нӕ хъусы ацы амындтытӕ туг дӕттыны рӕстӕг. Процесс йӕхӕдӕг уадиссаг ӕхсызгон нӕу. Фӕлӕ искӕй цард фервӕзын кӕнын дӕ бон кӕй у, уый ӕмбарын разӕнгард кӕны адæймаджы. Тынг ӕхсызгон мын у ацы ахадгӕ хъуыддаджы кæй архайын, зæгъы Валерий.
Хæххон металлургон институты 2 курсы студент Джидзæлаты Вячеслав та ныр ӕртыккаг аз у донор. Алы 2 мӕйы дӕр дæтты туг. Фæзминаг акцийы иувæрсты ацӕуын ныр дӕр йӕ бон нӕ баци.
Процедурӕ бынтондæр ӕдас у. Донорон туг вæййы 450 мл ӕмӕ дзы 5 мл ацӕуы типировкӕйыл, цӕмӕй генотип сбӕрӕг уа, уый тыххæй. Уыимӕ донорӕн йӕ уӕз хъуамӕ уа ӕппынкъаддӕр 50 килæйы. Ноджы ма ахсджиаг у ас æмæ уæзы ӕмахаст, буары массӕйы индексмӕ гӕсгӕ. Æппӕт басгӕрстыты фӕстӕ донацийы размӕ ӕнӕмӕнг сбӕрӕг кӕнынц ӕлхъывдад. Хорз у адджын цай бацымын дæр, цӕмӕй процедурӕйы рӕстӕг сӕр ма разила. Ӕмӕ ӕрмӕст уый фӕстӕ, адӕймаджы арвитынц биоматериал дæттынмæ.
Донор ссарыны фадат — 1 10 000-ӕй. Уымӕ гӕсгӕ ахсджиаг у, цӕмӕй, куыд гӕнӕн ис, афтӕ фылдӕр адӕм уа стӕджы магъзы донорты регистры. Ӕппӕты фыццаг сæ фӕагурынц рынчыны хӕстӕджыты ‘хсӕн. Уымӕн ӕмӕ сӕ ӕмхуызондзинад бӕрӕггонд цӕуы генетикон ӕгъдауӕй. Æфсымӕртæ ӕмӕ хоты ‘хсӕн донор ссарын æнцондæр у. Фӕлӕ хатгай рынчыны бинонты ‘хсӕн дæр нæ разыны. Æмæ уæд донор ссарын æнæмæнг у. Хӕрзаудӕн фонд “Быть добру” ӕмӕ службӕйы специалисттӕ 13 азы дӕргъы кӕнынц ахӕм акцитӕ.
Стӕджы магъз ратгæйæ, адæймаг балæвар кæны ӕппӕтӕй зынаргъдӕр — цард. Бархионты ӕмӕ медицинон кусджыты иумӕйаг архайдӕй ӕрмӕст нӕ республикӕйы къухы бафтыд 3400 потенциалон донорты ссарын. Донорон стӕджы магъзæй ныридӕгӕн 6 адæймаджы сдзæбæх кодтой.
