«Сам», афтæ хуыйны, ныр цалдæр азы æнтысджынæй чи кусы, уыцы проект. У хæрзаудæн фонд «Быть добру»-йы проекттæй иу.
Æххуыс кæнынц йе ‘нæниздзинад хъыгдæрд кæмæн у, уыцы адæмæн. Фонды архайджытæн сæрмагонд бынат нæ уыд. Ныр сын уыцы фадат фæзынд «Горный Воздух» сывæллæтты лагеры. Фæлæ нæ республикæйы коронавирусы ныхмæ кæй тох кæнынц, уый тыххæй фонды центр куыд æмбæлы, афтæ нæма кусы. Æххуыс кæнынмæ чи бæллы, уыдонмæ кæдфæндыдæр фонды архайджытæ се ‘ргом раздахынц.
Проекты сæйраг нысан у – йе ‘нæниздзинад хъыгдæрд кæмæн у, уыдонæн сæрмагонд реабилитацион фæрæзтæй баххуыс кæнын. Уыцы фæрæзты хыгъдмæ хауынц: хуыссæнтæ, вертикализатортæ, параподиумтæ, коляскæтæ æмæ ма æндæр гæрзтæ. Центрмæ телефонæй дзурынц адæм, цæмæй æххуыс кæмæн хъæуы, уыдонмæ фæкæсой. Ныры онг баххуыс кодтой 300 адæймагæй фылдæрæн. Кæд искæмæ цавæрдæр реабилитацион фæрæзтæ ис æмæ сæхи нал хъæуынц, уæд сæ раттæн ис хæрзаудæн фонды центрмæ. Архайджытæ та сæ сæрмагондæй бахæццæ кæндзысты фæкæсинаг чи у, уыдонмæ.
