Ацы бон скъолаты ахуыргæнинæгтæ æмæ рауагъдонтæ сæ ахуыргæнджытæн фæдзурынц бузныджы ныхæстæ. Ахуыргæнæг канд зонындзинæдтæ нæ дæтты, фæлæ ма фидæны фæлтæры хъомыладмæ дæр егъау æвæрæн хæссы. Хъайтыхъты Бэлæ ацы дæсныйадæн снывонд кодта 40 азы. Йæ куысты сусæгдзинæдтæ раргом кодта не`сфæлдыстадон къордæн.
Йæ гыццылæй нырмæ йӕ сылгоймаг зыдта, цавæр дæсныйадæн снывонд кæндзæн йæ цард, уый. Ахуыргæнæджы дæсныйад йæ зæрдæйы уæлдай бынат ахста. Уæвгæ, кæй бафæзмыдтаид, уый дæр ын уыд. Йæ баба æмæ йæ нана ахуырадæн бирæ азты дæргъы фæлæггад кодтой. Сты сгуыхт ахуыргæджытæ.
5-æм курсы студенткæ ма куы уыд, уæд чызджы фæхуыдтой Дигорайы дыккæгæм скъоламæ немыцаг æвзаджы ахуыргæнæгæй кусынмæ. Фыццæгты йын æнцон кæм уыд. Тарст, фаг зонындзинæдтæ йæм куы нӕ разына, уымӕй. Уæдæ йӕм фæлтæрддзинад кæй нӕй, уый дæр йæ куыстыл куы фæбæрæг уа, зӕгъгӕ, мӕт кодта. Фæлæ æрыгон ахуыргæнæгæн йæ бон ссис алы скъоладзауы зæрдæмæ дæр фæндаг ссарын. Уæвгæ йын хорз зондамонджытæ уыд. Йӕ цымыдисаг уроктæ йын ныр дæр рауагъдонтæ хорз хъуыды кæнынц. Кæцыдæртæн дзы сæ фыццаг ахуыргæнæг зонадон рухс ссыгъта. Уыдон дæр систы ахуыргæнджытæ. Бэла, ахуырадæн лæггадгæнгæйæ, йæхи раргом кодта куыд хорз курдиатджын ахуыргæнæг, афтæ разамонæг дæр. Директорæй фæкуыста 22 азы. Уыцы рæстæгмæ йын йæ хорз куысты фæдыл лæвæрд æрцыд бирæ хæрзиуджытæ æмæ кады гæххæттытæ. Уæдæ 2006 азы та сси республикæйы сгуыхт ахуыргæнæг.
Хъайтыхъты Бэлæйæн скъола афтæ уарзон у æмæ йын уал азмæ сси хи хæдзарау адджын, йе`мкусджыты æмæ ахуыргæнинæгты та нымайы йæ бинонтыл. Зæгъæн ис, ӕмӕ ацы бæрæгбон республикæйы сгуыхт ахуыргæнæг бæрæг кæны йæ бинонты æхсæн.
