Сæрды уарзондæр гагадыргъ, æвæццæгæн, æмæ харбыз у. Ныртæккæ фагæй фылдæр ис, фæлæ йæ бирæтæ æлхæнынмæ нæ тагъд кæнынц. Июлы астæу фаг рæгъæд нæу, зæгъгæ. Зæхкусæг Санахъоты Таймураз æй хорз зоны харбызты астæу æппæты адджындæр куыд равзаргæ у, уый. Фыццаджыдæр æркæсын хъæуы гагадыргъы хуызмæ.
Цæгат Ирыстоны харбызты стырдæр хæдзарад ис Змейкæйы. Санахъоты Таймураз ацы гагадыргъ зайын кæны 12 азы. Бирæ хуызтæ бафæлвæрдта. Фæлæ æрлæууыд дыууæйыл: каристан æмæ топганыл. Нæ бæстыгъæд сын хорз рауад. Зæхкусæг куыд зæгъы, афтæмæй афæдзæй-афæдзмæ мыггæгтæ зындæр ссарæн вæййы. Фæлæ уæддæр æрмæст ацы хуызтæ байтауы. Хур сæ бафсады æмæ уайтагъд астыр вæййынц.
Сæрдмæ Таймураз 35 гектарæй сисы 40 тоннæйы гагадыргътæ. Фыццаг тыллæг сæмбырд кæндзæн ацы бонты. Ныртæккæ рсепубликæйы бирæ бынæтты уæй кæнынц харбызтæ. Тæрхæджытыл ссарæн ис гагадыргъы алы хуызтæ.
Харбызты хæрзхъæддзинад æппынæдзух бæрæг кæнынц Фæлхасгæнджытæм цæстдарды управленийы специалисттæ. Уымæ гæсгæ гагдыргъæй тæрсын нæ хъæуы.
Харбыз æнæниздзинадæн пайда у. Сæрдыгон та уæлдайдæр. Æнтæф бонты, фылдæр хатт зæрдæ харбыз бацагуры. Йæ адджын мыдхæццæ донæй ком ауазал кæнынæй хуыздæр ма цы вæййы.
