Мæнæ афтæ – заргæйæ æмæ хъæлдзæгæй атæхынц сæ 4 кусгæ сахаты. Æмæ кæд тынг тæвд у ныртæккæ, уæддæр сæ архайд цæуы æнæ къуылымпытæй. Скъоладзаутæ ныр дæр цыма сæ ахуыргæнæдоны сты, уыййау. Æцæг ныр сæ ахуыргæнджытæ сты стæ бригадты разамонджытæ, æмхъласонтæ та – æмкусджытæ.
Дыргътæ æмбырд кæнын райдайынц райсомæй. 6 гектары фæзуатыл кусынц 30 скъоладзауæй фылдæр. Фæсивæд куыд зæгъынц, афтæмæй хуымæтæг архайд нæу. Хъæуы сæ арæхстгай тонын, цæмæй сæ тæрхæджытыл рæсугъдæй равæрой. Чылауитæ равзарынц æмæ сæ арвитынц уазалгæнæнтæм. Дыргъ дарын æнцон у, фæлæ дзы лыстæгдзинæдтæ дæр ис. Бæлас хъæуы афойнадыл бапырх кæнын, базилын æм. Науæд дыргътæ уайтагъд амбийдзысты. Уый скъоладзаутæ зонынц. Сæхæдæг дæр иу уыдысты дыргъдоны, федтой талатæ. Уæвгæ скъолаты фæллойадон къордтæ саразыны фæндон рахаста Кировы районы сæргълæууæг Нæкуысаты Барис.
Хъæууон-хæдзарадон кооператив “ДЕ—ГУСТО”-йы сывæллæттæн сарæзтой æппæт уавæртæ. Алы аз дæр сын вæййы фæллой кæныны фадат. Сывæллæттæн сæ архайд фæвæййы сихорæй. Уый фæстæ сæ аласынц сæ хæдзæрттæм. Ам ис 10 къорды, сæ хыгъды Елхоты 1-æм æмæ 3-æм скъолаты ахуырдзаутæ.
Сывæллæтты фæллой кæнын сахуыр кæнын, разæнгард сæ кæнын хибар царды уагмæ. Уыимæ ма сын хорз мызд кæй фидынц, уый та æрыгон кусджытæн у уæлдай æхсызгон.
