Спорты зымæгон хуызтæ чи уарзы уыдонæн æхсызгон хъусынгæнинаг. Дзæуджыхъæуы аразынц бирæвæрсыг комплекс, ног инфраструктурæ æмæ дыууæ ихыл бырæн фæзимæ. Проект ис хицæн инвесторты къухты. Куыстытæ кæд фæуыдзысты?
Нырма уал ам ис æрмæстдæр бетонæй къултæ. Цалдæр мæйы фæстæ та дзы фæзындзæн ихыл бырæн аренæ. Уыдзæн дзы дыууæ фæзы, иу – дæсны спортсментæн, иннæ та, – ихыл фыццаг къахдзæфтæ чи кæны, уыдонæн. Бæстыхай аразын райдыдтой афæдз размæ. Куыстытæ нырма сты фыццаг къæпхæны.
Хуымæтæг аренæ нæ уыдзæн, фӕлӕ æнæхъæн къомплекс ног инфраструктурæимæ. Спортивон залтæ, дзаумæттæ ивæн уаттæ, парахат хинайæнтæ æмæ спортуарджытæн трибунæтæ. Суанг ма дзы уыдзæн дзаумæттæ хусгæнæн бынат. Комплексы фæзуат саив кæндзысты. Спортсментæн ма дзы сараздзысты хостел дæр.
Ныры онг уал республикæйы ис ихыл бырæн иу галуан. Хоккеисттæн у иунæг бынат тренировкæтæн. Хæдахуыр архайджытӕ æмæ цæрджытæ дæр къахдзоныгътыл абырынмæ сæ мондæгтæ ам суадзынц. Уымæ гæсгæ иу аренæ фаг нæу.
Центр сифтонг кæндзысты нырыккон кусæнгарзæй. Уазалгæнæн генераторыл бакуыста, Мӕскуыйы Сырх фӕзыл ихын уӕлцъар саразынмӕ кусӕнгӕрзтӕ чи цӕттӕ кӕны, уыцы фирмӕ. Специалистты ныхæстæм гæсгæ аренæ цæттæ уыдзæн иннæ азы кæронмæ.
