Хицауады сæрдар Дзанайты Барис амыдта инвалидты фарстаты фæдыл къамисы æмбырд. Ныхас дзы цыд ахуырады фарстатыл, льготон хостæй сæ æххæст кæнын, æмæ æндæр социалон æххуысы фæрæзтыл. Ныртæккæ республикæйы ис, йе ‘нæниздзинад хъыгдæрд кæмæн у, ахæм 4 мин сывæллонæй фылдæр. Республикæйы скъолаты сæ ахуыр кæнынц 2 мин 315-æй, рæвдауæндæттæм та цæуынц 1 мин 986 сабийы.
Сæ ахуырадон процесс арæзт цæуы куыд хуымæтæг, афтæ инклюзивон хуызы дæр. Бакусынц алы сывæллонæн дæр сæрмагонд прграммæ саразыныл, сæ ныййарджыты фиппаинæгтæ хынцгæйæ. Ахæм сывæллæттæн æххуыс кæнынц профессионалон ахуырад исгæйæ дæр. Ныртæккæ медицинон хо æмæ хæринаггæнæджы дæсныйæдтæ, програмировани æмæ информацион технологиты, хæдтулгæты цалцæджы, экономикæйы, дизайны æмæ туризмы къабæзты ахуыр кæнынц 205 адæймаджы, 18-æй та ма сæрмагонд программæтæм гæсгæ. Дзанайты Барис æмбырды архайджытæн бабар кодта фарстайыл лæмбынæгæй кусын.
Ныхас ма кодтой, се ‘нæниздзинад хъыгдæрд кæмæн у, уыдоны льготон хостæй æххæст кæныныл. Ацы хъуыддагæн федералон бюджетæй рахай кодтой 230 млн 800 мин сомы, республиконæй та – 397 млн сомы. Уæлæмхасæн хуызы та ма, онкологон низтæ кæмæ ис, уыцы адæмы дзæбæхгæнæн мадзæлттæн рахай кодтой 150 млн сомы. Уымæй уæлдай, ацы азы 9 мæймæ республикон бюджеты руаджы 133 адæймаджы, се ‘хсæн 30 сывæллоны, райстой реабилитацион техникæйы 241 иуæджы.
