Дзæуджыхъæуы базарадон-экономикон колледжы сарæзтой уавæртæ «WorldSkills» дыууæ компетенцитæн: «Ресторанный сервис» æмæ «Амалхъомад». Æрмадзтæ аразынц нацпроекты фæлгæты. Дзуапп дæтдзысты нырыккон домæнтæн. Федералон æмæ республикон бюджеттæй уымæн рахай кодтой 61 млн сомы.
Ам, цыма рестораны дæ, афтæ. Профессионалон кусæнгарз, мебель æмæ видеокамерæтæ. Студенттæ та сты персонал. Сæхæдæг стъол саив кæнынц, уазджыты æрбахонынц. Федералон æмæ республикон бюджетты æхцатæй сарæзтой уавæртæ «WorldSkills» дыууæ компетенцитæн: «Ресторанный сервис» æмæ «Амалхъомад». Хицауады сæрдар Дзанайты Барис, ахуырад æмæ наукæйы министр Алыбегты Эллæимæ бабæрæг кодтой фæзуаттæ.
Нырыккон кусæнгарзыл архайын студентты ахуыр кæндзысты фæлтæрдджын педагогтæ. Колледжы директор Æбиты Валерийы ныхæстæм гæсгæ, ныртæккæ фарстайыл кусынц.
Фæсивæды ахуыр кæнынц бизнес-плантæ аразын, наукон-иртасæн куыстытæ кæнын, семинартæ æмæ конференцитæ. Студенттæ равдыстой сæ фыццаг проекттæ дæр. Фыццаг къахдзæфтæ чи кæны, уыцы специалистты курдиатæн аргъ скодта премьер Дзанайты Барис.
Ахæм æрмадзты фæрцы студентты зонындзинæдты хæрзхъæддзинад фæхуыздæр вæййы. Ныр зонгæ кæндзысты теориимæ, цæудзысты практикæ. Ахсджиаг у дæсны кусджыты бацæттæ кæнын, – фæнысан кодта Дзанайты Барис.
Ацы аз фондз астæуккаг профессионалон ахуыргæнæндоны ивд æрцæудзæн материалон-техникон бындур. Æрмадзтæ аразынц 5 къабазмӕ гæсгæ: аивад, дизайн æмæ лæггæдты къабаз, информацион-коммуникацион технологитæ, арæзтад, хъæууон хæдзарад, социалон къабаз. Уыцы мадзæлттæн рахай кодтой 61 млн сомы. Æрмадзтæ аразынц æппæт домæнтæм гæсгæ.
