Хуссар Ирыстоны ацы бонты цæудзысты номарæн мадзæлттæ. Баст сты 11 азы размæ, 8-æм августы цы тугкалæн цаутæ æрцыдысты, уыдонимæ. Цæмæй сæ ныр геноцидыл банымайой, уый тыххæй Хуссар Ирыстоны Президент Бибылты Анатолий раргом кодта йæ хъуыдытæ фæсарæйнаг журналисттæн. Иумæ дзырдтой хæстæгдæр рæстæг цы мысæн мадзæлттæ ацæудзысты республикæйы, уый тыххæй дæр. Æвирхъау цауты æмæттæгты нæмтæ æрымысдзысты Цæгат Ирыстоны дæр. Райсомæй- изæрмæ Дзæуыджыхъæуы цæудзысты сæрмагонд мадзæлттæ. Райдайдзысты Нымысы Аллеяйы. Сыгъдæг Георгийы номыл аргъауаны кæрты та сараздзысты акци «Свеча памяти», зæгъгæ. Йæ амидингæнджытæ сты нæ республикæйы фæсивæды хъуыддæгты фæдыл комитет. Уыцы тугкалæн цауты чи бацарæфтыд, уыдоны нæмттæ Хуссар Ирыстоны цæрджытæ мысынц аизæр. Уæвгæ, рох сæ æппындæр нæ кæнынц. Сæ цæстытыл, нырма дæр уайынц. Нæ дарддæры æрмæг уымæн æвдисæн. Бакæсут ма йæм.
2008 -æм азы уæззау цаутæ Колыты Азæйы цæстытыл арæх ауайынц. Æнæ цæстысыгæй сæ йæ бон дзурын дæр нæ вæййы. Сылгоймаг йæ дыууæ хъæбулы хъæбул æмæ йæ сыхæгтимæ ныккæнды æмбæхстысты. Нæмгуыты æхссит æмæ срæмыгътыты хъæрæн кæрон дæр нæ уыд. Сабиты Гуырдзиаг тугдзыхтæй бахъахъхъæныны тыххæй Колыты Азæйы бинонтæ сфæнд кодтой алидзын. Азæйы чындз Хъотайты Маринæ республикон рынчындоны реанимацион хайады медицинон хо йæ куыста. Уый не сразы бинонтимæ цæуын. Хæсты чи фæцæф уыдонæн медицинон æххуыс бакæнын хъæуы, зæгъгæ. Гуырдзиагтæ фæндагыл комкоммæ æхстой алы хæдтулгæтæ дæр. Ног хъæуы цæрджытæ цы автобусы цыдысты ууыл дæр нæ бацауæрзтой.
Хъæуы цæрджытæн сæ къухы бафтыд сæйраг фæндагæй фæзилын. Уым фæсфæд ран бамбæхсгæйæ æнхъæлмæ кастытсты æххуысмæ. Фæстæдæр сæ ссардтой Бархионатæ. Уыдон сæ фæхæццæ кодтой Дзауы хъæумæ.
Колыты Азæйæн фæстæдæр йæ къухы бафтыд Дзæуджыхъæумæ ралидзын. Фæлæ сылгоймаг фæстæмæ фæкæс фæкæс гæнгæ цыд. Йæ зæрдæ æхсайдта Хуссар Ирыстоны ма йæ бинонтæй кæй ныууагъта, уыдонмæ. Кæд Колыты Азæ йæ райгуырæн бæстæйæ ралыгъд, уæд Битарты Зоя та йæ цæрæнбынат нæ ныууагъта. Хæсты рæстæг бамбæхст ныккæнды.
Августы мысæн бонты рæстæг Хуссар Ирыстоны зæрдæты хъæдгæмттæ уæлдай тынгдæр фæриссынц. Республикæйы сæдæгай цæрджытæ фесæфтой сæ бинойнæгты. Ацы бонты сын æрхъуыды кæнынц сæ рухс нæмттæ.
Уазиты Зæлинæ
