Нæ программæйы кæрон та радзурдзыстæм Хуссар Ирыстоны сывæллæтты фæлладуадзынæн цы уавæртæ аразынц, уый тыххæй. Республикæйы æххæстæй сног кодтой кæддæр æгас цæдисыл йæ ном хъуыстгонд кæмæн уыд, уыцы лагерь Мзиугом. Фæсивæдæн дзы сарæзтой алцыдæр сæ рæстæг пайдаимæ арвитынæн. Уæрæх уаттæ, беседкæтæ, амфитеатр æмæ спортивон фæзтæ. Проекты райрæзтæн радих кодтой 400 милуан сомæй фылдæр.
Алы уаты дæр хисыгъдæггæнæнтæ æмбæлгæ уавæртимæ. Уæлæдарæс æмæ дзаумæттæ дарынæн дзы ис тумбочкæтæ æмæ скъæппытæ. Бахизæны стыр стъол, чингуытæ кæсынмæ кæнæ та ныхас кæнынмæ. Уæвгæ, цымыдисаг рæстæгæрвыстæн сарæзтой хицæн бынæттæ, нырыккон техникæимæ. Ахæм та у коттеджы æддаг хуыз.
Æдæппæтæй территорийы ис 5 бæстыхайы, иууылдæр сты æмхуызон хуызы, бынат дзы ис 30 адæймагæн. Уыимæ ма административон корпус, хæрæндон, медицинон пункт, Гæрзтæ æхсæн бынат. Кæрты та мæнæ ахæм бадæн бынæттæ, егъау амфитеатр æмæ футболон фæз дæр. Алæмæты æрдз æмæ сыгъдæг уæлдæф. Ацы бынат хуымæтæджы нæ равзæрстой. Мзиугом рагæйдæр хъуыстгонд уыд йæ климæтæй. Æппæт Советон Цæдис дæр зыдта ам цы дзæбæхгæнæн лагерь уыд, уый. Хæстон цауты фæстæ заууат уавæрмæ æрцыд. 2021-æм азы райхæлдтой.
Бауагътой коммуникацитæ, сæвæрдтой асфальт, рухсгæнæнтæ, банывыл кодтой хæдтулгæтæ æвæрæн бынат. Фæзуат æдæппæтæй у цыппар гектарæй фылдæр. Бæстыхайы кæронмæ æрхæццæ сты ифтонггæрзтæ бæрæг кæныны куыстытæ дæр.
Фæлладуадзæн базæ сарæзтой Хуссар Ирыстоны социалон-экономикон райрæзты инвестицион программæмæ гæсгæ. Проект аргъ — 400 млн сомы бæрц. Республикæйы хицауад фæнд кæны лагерь æрвылазон скæнын. Цæмæй дзы фæсивæд канд сæрды ма улæфой, фæлæ иннæ афонты дæр.
