Сывæллæтты иу рæвдауæндон æмæ 5 хицæн къорды сæхгæдтой карантины

Сывæллæтты иу рæвдауæндон æмæ 5 хицæн къорды сæхгæдтой карантины. Бæрæггæнæнтæм гæсгæ, æхснырсæгæй рынчынты нымæц скъолайы агъоммæ кусæндæтты нормæйæ фылдæр нæу.
Уый тыххæй Сергей Меняйлойæн аппаратон æмбæрды рæстæг фехъусын кодта ахуырад æмæ наукæйы министр Алыбегты Эллæ. Фæлхасгæнджытæм цæстдарды управленийы разамонæг Тыбылты Алан радзырдта, хæцгæ низты эпидемиологон уавæр нывыл кæй у, уый тыххæй. Гриппæй рынчын адæймæгтæ нæ республикæйы нæй, коронавирусæй та сæхи дзæбæх кæнынц 30 адæймаджы. Æмбырды сæйраг темæты ‘хсæн ма — хъармгæнæн сезоны цыд. Цæрæнуæтты-коммуналон хæдзарад, артаг æмæ энергетикæйы министр Таматы Майрæны ныхæстæм гæсгæ, республикæйы æппæт бирæфатерон хæдзæрттæм дæр хъарм раттой. Сергей Меняйло бабар кодта хъармгæнæн системæйы куыстимæ къуылымпыдзинæдтæ цы скъолатæ æййафынц, уыдон бабæрæг кæнын. Аиуварс сæ кæнын фæззыгон каникулты æмгъуыдмæ. Ноджы ма иу фарста – разамынддæттæг компаниты архайд. Сæргълæууæг бахæс кодта саразын разамонджытимæ æмбырд. Быроны хæтæлтæ æмæ камерæтæ чи не сцалцæг кодта, уыдоны бафхæрдзысты, райсдзысты сын сæ лицензи.