Ивгъуыд къуыри Цæгат Ирыстоны нысангонд æрцыд 96 зынгсирвæзты. Сæ фылдæры аххосаг у бæрзонд температурæ.
Уый тыххæй фехъусын кодтой аппаратон æмбырды. Æппæтæй егъаудæр зынгсирвæзт æрцыд Кæрдзыны. Арт хуыссын кодтой цалдæр сахаты. Хъыгдæрд дзы ничи баййæфта. Æнæнхъæлæджы уавæрты министрады архайдмæ Сергей Меняйло æрхаста фаутæ. Сæргълæууæг фæнысан кодта, ахæм зынгсирвæзт цæрæн пункттæн тæссаг кæй у, уымæ гæсгæ бабар кодта оперативон штабы куыст фæтагъддæр кæнын. Аппаратон æмбырды ма ныхас цыд Мæздæджы тыхджын дымгæимæ тæрккъæвдатæ цы зиан æрхастой, уый фæстиуджытæ иуварс кæныныл. Сергей Меняйло бадомдта куыстыты кæронмæ æнæнхъæлæджы уавæры фæтк ма сисын. Районы сæргълæууæгæн та цæрæнуæтты-коммуналон хæдзарады министримæ иумæ цæст дарын æппæт мадзæлттæм дæр. Æмбырды ма ныхас цыд æнæзакъон бырондæттыл дæр. Ахæмтæ хъуамæ республикæйы ма уа, загъта Сергей Меняйло. Æмæ фæнысан кодта, йæхæдæг кæй бæрæг кæндзæн уавæр. Уæлдай æргом здæхт æрцыд Беслæны æвирхъау цауы 20 азы мадзæлттæм. Æппæт ведомствотæн дæр бабар кодта æдасдзинад домæнтæ сæххæст кæнын.
