479 милуан сомы схардз кодтой чысыл æмæ астæуккаг бизнесыл Цæгат Ирыстоны. Уый рауад чысыл æмæ астæуккаг амалхъомады корпорацийы ‘руаджы.
Уыдон банчы кредиты æрдæг хай æхгæнынц. Уыимæ ахæм лæггад аразынц залог йæ бон кæмæн ныууадзын нæу, уыдонæн дæр. Паддзахадон ахæм æххуыс райстой нæ республикæйы 94 амалхъом адæймаджы. Фаронимæ абаргæйæ цы фæрæзтæ радтой, уыдон фæфылдæр сты 5 хатты. Æмæ уый у æрмæст афæдзы æрдæгмæ.
Программæ арæзт цæуы Уæрæсейы Президенты уынаффæйы фæстæ национ проект “Чысыл æмæ астæуккаг амалхъомад”-мæ гæсгæ. Цæгат Ирыстон та æххуыс кæны экономикæйы рæзт æмæ ног куысты бынæттæ саразыныл чи архайы, уыдонæн. Нæ регионы чысыл æмæ астæуккаг амалхъомады чи архайы, уыдоны нымæц азæй-азмæ рæзы. Ныртæккæ къабазы кусы 17 мин субъекты.
