19-аздзыд Кæсæбиты Алинæ у фыццаг ирон чызг, Дунейы чемпион сылгоймæгты уæгъдибар хъæбысхæстæй чи ссис. Цыбыр рæстæгмæ чызг, зындзинæдты сæрты хизгæйæ, сси Уæрæсейы, Европæйы æмæ Дунейы ерысты фыццаг. Уæлахиздзауимæ фембæлд не сфæлдыстадон къорд.
Афæдзы æрдæгмæ иу уæлахиз иннæййы фæдыл. 19-аздзыд Кæсæбиты Алинæ цыбыр рæстæгмæ, фæд-фæдыл ссис Уæрæсейы, Европæйы æмæ Дунейы ерысты хуыздæр.
Хуымæллæггаг чызджы 10-аздзыдæй йe`фсымæр æрбакодта уæгъдибар хъæбысхæсты секцимæ. Йæ зæрдæмæ фæцыд. Чызг абоны онг дæр йæ равзæрст фæндагыл нæ фæфæсмон кодта. Зæгъын хъæуы уый, æмæ Алинæйы мад йæ чызджы фæндимæ разы нæ уыд, æндæр хъуыдыйыл хæст уыд йæ фыд дæр. Ацы спорты хуызыл чызг афтæ æнувыд у, æмæ ма суанг йæ фыццаг тренировкæ дæр йæ зæрдыл дары.
Алинæ йæ тренер Къудухты Олегимæ тренировкæты рæстæг бирæ ног æмæ хъæугæ премтæ базыдта. Уæдæ йæхиуыл удуæлдай куыст кæй кодта, æмæ ма йын йæ хистæр уыцы рæстæг раст зонд кæй амыдта, æппынæдзух æм йæ хъус кæй дардта, уый фæстиуджытæ ныр сты — бæрзонд бæрæггæнæнтæ.
Алинæ хъæбысæй хæцы 62 килограммы онг уæзы. Дарддæр кæны тренировкæтæ, йæхиуыл кусы. Спортсменкæ цæттæ кæны спортивон хъæбысхæстæй Дунейы чемпионатмæ. Ацæудзæн Европæйы сæйраг горæттæй иу — Ослойы. Алинæйы сæрæндзинад дисы æфтауы: тренировкæтæй уæлдай-ма, ахуыр кæны ЦИПУ-йы физкультурæ æмæ спорты факультеты. Чызг хæрзæрыгон у, æмæ æй ныфс ис, йæ къухы ма бирæ æнтыстзинæдтæ кæй бафтдзæн, уый. Йæ спортивон фæндæгтæ нырма разæй сты. Зындзинæдты сæрты хизгæйæ, тырндзæн спортивон Олимпмæ.