Карантины сæхгæдтой 2 скъола æмæ сывæллæтты 7 рæвдауæндоны

Карантины сæхгæдтой 2 скъола æмæ сывæллæтты 7 рæвдауæндоны. Низы аххосæй ахуырадон уагдæттæм чи не ‘рбацыд, уыдоны нымæц 20%-æй ахызт. Уый тыххæй æрвылкъуырион аппаратон æмбырды фехъусын кодта Роспотребнадзоры республикон управленийы разамонæг Тыбылты Алан. Куыд загъта, афтæмæй æхснырсæг æмæ коронавирусæй рынчынты нымæц рæзы, фæлæ æбæлгæ бæрæггæнæны сæрты нæ ахызтысты. Дохтыртæм чи бацæуы, уыдоны 70%-æй фылдæр сты сывæллæттæ. Æмбырды ма куыд рабæрæг, афтæмæй специалисттæ Цæгат Ирыстоны бæрæг кæнынц хидты уавæр. Сæ фылдæр хайы инспекци ацыд, Дзæуджыхъæуы федтой 4 хиды. Зæрдæмæдзæугæ сæ иуы уавæр дæр нæу, фæбæрæг кодта профилон бæрнады разамонæг Солиты Тариэль. Республикæйы сæргълæууæг бабар кодта, куыст дарддæр ахæццæ кæнын, фылдæр хъус æрдарын – регионы сæйраг горæтмæ. Басгæрсты хатдзæгтæм гæсгæ, хъæуы объектты цалцæджы мадзæлтты хыгъд снысан кæнын. Ныхас цыд регионалон оператор “Эра”-йы куысты фæдыл тæрхондонмæ цы домæн лæвæрд æрцыд, ууыл. Уый фæдыл Сергей Меняйло Роспотребнадзоры республикон управленийæн бауайдзæф кодта. Домæн бадæттыны размæ уал хъуыддагыл æрдзурын хъуыди Цæгат Ирыстоны æххсæтгæнæн хицауадимæ, зæгъгæ. “Эра” ныртæккæ регионы иунæг быронласæг куыстуат у. Ахæм фарстатыл кусын хъæуы Цæрæнуатон-коммуналон хæдзарады министрад æмæ хицауады дзуапдæттæг кусджытимæ иумæ, загъта регионы разамонæг. Йæ ныхасмæ гæсгæ, ахæм митæ расайынц æвзæр фæстиуджытæм, уый бæрæг у бæстæйы иннæ субъектты дæнцæгмæ гæсгæ. Уæ зæрдыл уын æрлæууын кæндзыстæм, ведомствæ регионалон оператор “Эра”-йы куысты фæдыл тæрхондонмæ домæн балæвæрдта. Аххосаг – æрвылбон бырон кæй нæ ласынц, уый.