Дзæуджыхъæуы космонавтикæйы скъола æмæ планетари бæрæг кæны йæ равзæрды бон. Космосы сусæгдзинæдтимæ ныр афæдз зонгæ кæнынц сывæллæтты. Республикæ ацы цаумæ рагæй æнхъæлмæ каст. Абон проекты райрæзтыл чи архайдта, уыдоны арфæйы фыстæджытæй фæнысан кодта республикæйы сæргълæууæг Битарты Вячеслав.
Афæдз размæ сæ дуæрттæ байгом кодтой космонавтикæйы скъола æмæ планетарий. Сывæллæтты космосон центрæн æгас бæстæйы æмбал нæй. Сырх лент кадджын уавæры алыг кодтой Советон Цæдисы хъæбатыр, тæхæг-космонавт Владимир Джанибеков æмæ космонавт, борт-инженер Александр Лазуткин. Планетарий ифтонггонд у нырыккон кусæнгæрзтæй. Уый руаджы уазджытæн фадат ис Хуры системæмæ æмæ стъалытæм фæхæстæгдæр уæвынæн.
Ракетæты макеттæ, космонавтты æцæг бадæн бынæттæ, космосон аппараты разамынды панельтæ монитортимæ, мин хатты хæстæгдæр чи `вдисы, ахæм телескоптæ. Планетарий куы байгом, уæдæй нырмæ дзы Дзæуджыхъæу æмæ районты скъоладзаутæн сарæзтой дæсгай экскурситæ.
Гуырæнбоны куыд æмбæлы, афтæ – лæвæрттæ æмæ арфæтæ. Битарты Вячеслав. стъалытæ нæм кæй фæхæстæгдæр сты, уый тыххæй арфæйы ныхæстæ ракодта космосон конструктор Комайты Русланæн.
Арфæйы фыстæджытæй фæнысан кодта алыхуызон къабæзты кусджыты. Уыдон архайдтой «Космонавтикæйы скъола»-йы проекты. Битарты Вячеслав дæр уыд хæрзгæнджыты ‘хсæн. Уый руаджы фæзынд ацы скъола.
Специалистты ныхæстæм гæсгæ, ног космосон центрæн æгас бæстæйы æмбал нæй. Æцæг космосон центр. Экспонаттæ иууылдæр къухæй басгарæн ис. Зæгъæм, ам фенæн ис америкаг аппарат «Аполлон». Космосон нау 1969 азы Зæххы цæрджыты фæхæццæ кодта Мæймæ. Ныртæккæ космонавтикæйы истори æмæ нырыккон техникæимæ ам зонгæ кæнынц сывæллæттæ.
Уазиты Зæлинæ
